„Eftir einungis tvö ár höfum við sagt okkur frá öllum trúnaðarstörfum fyrir Seltjarnarnesbæ og gerum svo með trega,“ segir í grein eftir Kristján Hilmi Baldursson og Sigríði Sigmarsdóttur í nýjasta tölublaði Nesfrétta.
Kristján er formaður Baldurs, félags ungra sjálfstæðismanna á Seltjarnarnesi og í stjórn fulltrúaráðs Sjálfstæðisfélaganna og Sigríður er varamaður í bæjarstjórn fyrir Sjálfstæðisflokkinn. Í grein sinni skrifa þau um stöðu mála á Seltjarnarnesi en nokkuð hefur verið rætt um halla á rekstri bæjarins. Þau hafa nú sagt sig frá trúnaðarstörfum fyrir bæinn.
„Við höfum oft staðið fyrir framan aðra foreldra, íbúa eða kunningja og reynt að svara spurningunni “Hvernig datt þér í hug að…” Þú stendur fyrir framan viðkomandi og veist jafnvel ekki hvað hann vitnar í og hugsar “ég? hvað gerði ég?” og í ljós kemur að það er fimmtudagsmorgun og bæjarstjórn samþykkti eitthvað á fundinum sínum deginum áður. Áður en þú veist af ertu farinn að afsaka eitthvað sem þú veist ekki deili á því síðustu upplýsingar sem þú fékkst voru ekki nógu ítarlegar eða rangar. Guð má vita, ekki fékkst þú að taka þátt í ákvörðuninni,“ segir í greininni.
Þá fær bæjarstjórinn Ásgerður Halldórsdóttir sinn skerf af gagnrýni í grein þeirra Kristjáns og Sigríðar.
„Bæjarstjórinn okkar er harðstjóri. Hún hlustar ekki á samstarfsfélaga sína, bæjarbúa sem hún á að þjóna eða sína nánustu trúnaðarmenn. Hún er eyland. Dag einn þarf maður að draga línuna í sandinn og hætta þessari meðvirkni sem myndast hefur innan meirihluta bæjarstjórnar Seltjarnarness. Eldmóðurinn, krafturinn, viljinn og metnaðurinn sem var til staðar við upphaf ferðalagsins, stefnuskráin og gildi flokksins allt fokið út í veður og vind með norðanáttinni.“
Þá segir að vanhugsaðar ákvarðanir án samráðs og ákvarðanafælni endurspegli vinnubrögð núverandi meirihluta bæjarstjórnar. Þá hafi ástandinu vegna COVID-19 verið kennt um hallarekstur.
„Nú, Covid er mætt og því verða allar afsakanir um lélegan rekstur bendlaðar við faraldurinn en ekki vanhæfa stjórnarhætti bæjarstjórnar. Hverjar eru afsakanirnar fyrir síðustu tvö ár? Eitt best rekna sveitarfélag á landinu, sveitarfélag sem horft var til sem fyrirmyndar í rekstri, má nú líkja við Reykjavík 2.0. Hagsmunir Seltirninga eru ekki varðir gegn ákvörðunum borgaryfirvalda og þegar ítrekað er kallað eftir viðbrögðum bæjarstjóra ná fréttamenn ekki einu sinni í hana og af því stærir hún sig. Er ekki undarlegt að fagna því að svara ekki fyrir andmæla- og ákvörðunarleysi?“
Í lok greinar sinnar segja þau: „Við þökkum alla þá velvild og traust sem bæjarbúar sýndu okkur í síðastliðnum kosningum. Okkur þykir leitt að hafa brugðist hlutverki okkar. Okkur þykir leitt að hagsmunir bæjarbúa séu ekki í hávegum hafðir. Okkur þykir leitt að styrk fjármálastjórn er ekki lengur til staðar. Síðast en ekki síst þykir okkur leitt að segja af okkur en nú er komið nóg.“
Greinina má lesa í heild á síðum 12-13 í Nesfréttum.