Kristján Guy Burgess, sérfræðingur í alþjóðastjórnmálum, rifjar upp skemmtilega sögu af því þegar hann hitti Joe Biden, sem tók við embætti Bandaríkjaforseta í gær, á hóteli í New York fyrir margt löngu.
Kristján segir að í minningunni séu eftirfarandi orð þau einu sem hann hefur átt við nýjan forseta Bandaríkjanna. „Mætti ég fá að stinga tölvunni minni í samband hérna?"
Kristján segir á Facebook að þeir félagar hafi verið í setustofu á frekar litlu hóteli í New York, Biden djúpt sokkinn í einhver gögn en hann sjálfur með rafmagnslausa tölvu að reyna að vinna.
"Sure," sagði Biden og ég klöngraðist eitthvað í kringum hann og kom tölvunni í hleðslu. Tveir karlar, annar reyndur og amerískur, hinn ungur og íslenskur könkuðust þannig á en lífið hélt áfram og þetta augnablik hefði orðið gleymskunni að bráð ef sá ungi hefði ekki verið svona fullur hrifningar af hinum reynda bandaríska þingmanni.“
Kristján rifjar svo upp að hann hafi séð hann nokkru síðar taka við útnefningu sem varaforsetaefni Baracks Obama á flokksþingi Demókrata árið 2008. Það var meiriháttar upplifun, að sögn Kristjáns.
„Síðustu misserin hef endurvakið áhuga minn á Biden og sögu hans, lesið margt og hlustað og horft á viðtöl og ræður. Við hvert skipti eykst virðing mín fyrir manninum, fyrir sögu hans, hvernig hann hefur tekist á við stærri erfiðleika en nokkur ætti að þurfa að reyna. Hann missti það sem var dýrmætast af öllu, eiginkonu í blóma lífsins og unga dóttur í bílslysi, og síðar elsta soninn úr hræðilegum sjúkdómi, en tókst að vinna með sorgina og missinn og halda áfram og hefur nú náð því embætti sem hann stefndi að frá unga aldri.“
Kristján segir að pólitík hans um samvinnu og sættir án þess að hvika frá þeim gildum sem gerðu hann að demókrata falli honum í geð.
„Hann tekst á við hlutina eins og þeir eru, ekki eins og þeir ættu að vera og stefnir stöðugt að því að miða málunum áfram,“ segir Kristján sem hvetur sem flesta til að horfa á ræðu Bidens í gær þar sem hann kallar á að Bandaríkjamenn sameinist á ný.
„Munurinn á hinum nýja forseta og þeim sem yfirgaf Hvíta húsið í gær gæti ekki verið meiri,“ segir Kristján sem ræddi forsetaskiptin einmitt í Kastljósi í gærkvöldi.