Kristinn harðorður: „Fávitagangurinn verður að enda“

Kristinn Hrafnsson, reyndur fjölmiðlamaður og núverandi ritstjóri Wikileaks, segir að það sé ekki sjálfgefið viðbragð við óljósum fréttum um hryðjuverkaárás að veita lögreglu auknar rannsóknarheimildir og skerða persónuvernd eða frelsi.

„Það er heldur ekki sjálfgefið að leysa vanda heilbrigðiskerfisins með því að einkavæða þjónustuna heldur að bæta hina opinberu og styrkja forvirkar hollustuaðgerðir. Það á ekki að refsa veikum fíklum með því að setja þá í handjárn. Lögreglan á ekki að snúast í heilbrigðismálum.“

Kristinn segir að hugsa þurfi málin upp á nýtt og viðurkenna gjaldþrot þeirrar stefnu sem er fylgt.

„Gjaldþrotið snýr að hagsmunum almennings en vissulega græðir fámennur hópur á gjaldþrotastefnunni. Betra samfélag með auknu heilbrigði, öryggi og lýðræði fæst með áherslu á fræðslu, sterka innviði, átaki í umburðarlyndi og auknum almennum jöfnuði. Og að sjálfsögðu að hætta að standa vegi fyrir innleiðingu nýs samfélagssáttmála í stjórnarskrá sem almenningur kom sér saman um.“

Kristinn bendir á ástandið í Bandaríkjunum.

„Í henni Ameríku er kraumandi reiði almennings svarað með hervæðingu lögreglu, fjölgun fangelsa og herðingu refsidóma. Þar er stungið upp á því að svara skotrásum ungmenna í skólum með því að láta kennara bera byssur. Fávitagangurinn verður að enda og grípa til aðgerða sem virka. Stríð er ekki friður. Orwell var ekki að skrifa handbók heldur varnaðarorð.“