Kristín Sigurjónsdóttir segir að hún hafi upplifað sig sem ferlega leiðindaskjóðu að undanförnu fyrir að vilja að fólk fari eftir tveggja metra reglunni í því ástandi sem nú ríkir. Hún segist hafa upplifað sig öruggari í útlöndum en hér heima.
Kristín, sem er fréttastjóri Trölla.is skrifar um upplifun sína, en hún hefur dvalið á Spáni síðustu mánuði en er nú komin heim til Íslands.
„Forsaga þessarar leiðinda upplifunar er að ég kom erlendis frá fyrir um tveimur vikum síðan eftir að hafa dvalið þar í Covid-19 storminum,“ segir hún en útgöngubann ríkti um tíma og eftir að því lauk voru sett fjarlægðarmörk og grímuskylda sett á. Hún segir að allan þann tíma sem hún dvaldi erlendis hafi hún upplifað sig örugga og allir hafi tekið tillit til hver annars.
„Það var alveg sama hversu rými voru lítil, það var alltaf fundin lausn á að viðhalda fjarlægðarmörkum fyrir bæði viðskiptavini og starfsfólk.“
Kristín segir að þegar hún flaug heim hafi henni fundist að ekki væri farið eftir þeim reglum sem voru við lýði á Íslandi. Þannig hafi hún setið við hliðina á alls ókunnugri manneskju þó að fjöldi sæta væri laus í vélinni.
„Eftir að hafa farið í Covid-19 sýnatöku í Leifsstöð var brunað beint heim norður í land. Þar fór ég algjörlega eftir þeim reglum sem settar voru um heimkomusmitgát og lauk henni þegar SMS-ið frá smitrakningu kom, eftir seinni sýnatökuna, um að ég reyndist vera neikvæð,“ segir hún.
Þegar neikvæða niðurstaðan barst fór hún að fara út á meðal fólks, í göngutúra og verslanir. „Nýlega varð ég fyrir hálfgerðu áfalli, ég hef margoft orðið þess vör að það er engan veginn verið að virða mannréttindi mín og þær reglur sem settar hafa verið vegna 2ja metra reglunnar,“ segir hún og bætir við að þegar hún maldaði í móinn í eitt sinn hafi hún upplifað sig sem nöldrandi leiðindaskjóðu.
„Því í ósköpunum á ég að þurfa að upplifa leiðindi vegna þess að ég vil fara eftir þeim reglum sem settar hafa verið til að verja okkur? Er bara alls ekki sátt við það.“
Kristín segir að hún sé ekki tilbúin að forðast það að fara út á meðal fólks og lifa eins eðlilegu lífi og hægt er bara því sumum samborgurum hennar finnst þeir ekki þurfa að fara eftir reglum.
„Ég ætla að taka ábyrgð á mér og gera allt sem í mínu valdi stendur til að viðhalda öryggi mínu og minna. Get alls ekki sætt mig við að vera litin hornauga þegar ég bið fólk vinsamlega að taka tillit til 2ja metra reglunnar. Vil einnig þakka þeim sem virða hana. Vinsamlega takið tillit til mín.“
Pistill Kristínar í heild sinni.