Sigurgeir Bjarni Guðmannsson, framkvæmdastjóri Íþróttabandalags Reykjavíkur til rúmlega 40 ára og einn dyggasti KR-ingur landsins, lést á Vífilsstöðum þann 30. desember síðastliðinn. Sigurgeir fæddist í Reykjavík árið 1927 og var því 93 ára þegar hann lést.
Fjölmargir minnast Sigurgeirs í Morgunblaðinu í dag, en eins og að framan greinir var hann dyggur KR-ingur. Hann spilaði fótbolta með yngri flokkum félagsins og sneri sér svo að þjálfun árið 1951 og var þjálfari yngri flokka félagsins í áratugi. Þá þjálfaði hann meistaraflokk félagsins, sem vann til allra þeirra verðlauna í boði voru. Undir hans stjórn urðu KR-ingar til dæmis Íslands- og bikarmeistarar árið 1963 og þá var hann í teymi KR-inga sem mættu Liverpool á Anfield í Evrópukeppninni árið 1964.
Sigurgeir var formaður knattspyrnudeildar KR og einnig handknattleiksdeildarinnar. Hann var gerður að heiðursfélaga KR og ÍSÍ, fékk gullstjörnu ÍBR, gullmerki KSÍ og Knattspyrnuþjálfarafélags Íslands. Þá var hann sæmdur riddarakrossi hinnar íslensku fálkaorðu fyrir störf á vettvangi íslenskrar íþróttahreyfingar.
Gylfi Dalmann Aðalsteinsson, formaður KR, segir að Sigurgeir hafi haft mikil áhrif á starf og uppbyggingu KR upp úr miðri síðustu öld. Hann rifjar svo upp skemmtilega sögu af samskiptum hans við Sigurgeir.
„Þegar ég var nýtekinn við sem formaður KR hitti ég Sigurgeir í KR-heimilinu, hann spurði mig hvort ég væri ekki orðinn formaður KR? Jú sagði ég, þá svaraði hann: „Þú ert ekki nægilega snyrtilegur til fara.“ Það var ekki nægilegt í hans huga að formaður KR væri í gallabuxum og skyrtu, hann ætti að vera í jakkafötum með bindi. Þegar hann var inntur eftir því hvort það væri ekki mikill heiður að vera gerður að heiðursfélaga KR sagði hann: „Jú vissulega, en fyrir hvað?“ Við KR-ingar þökkum Sigurgeiri fyrir allt sem hann gerði fyrir gamla góða KR og minnumst hans með hlýhug og af virðingu og þökkum honum samfylgdina í gegnum tíðina og vottum aðstandendum innilega samúð.“
Ellert B. Schram, KR-ingur, fyrrverandi þingmaður og fyrrverandi formaður KSÍ, minnist Sigurgeirs einnig með hlýhug í grein sinni. Hann segir að Sigurgeir sé ein helsta kempan sem gerðu KR að því stórveldi sem félagið er.
„Hann hafði óvenjunæman skilning á góðri knattspyrnu og vissi upp á hár hvernig ætti að gera KR-liðin miklu betri og þar með á endanum íslenska knattspyrnu í heild – ekki með einspili heldur samspili, ekki með glórulausu puði heldur með því að lesa leikinn, ekki með fautaskap heldur léttleika. Í þessum efnum var Sigurgeir langt á undan sinni samtíð,“ segir Ellert en Sigurgeir þjálfaði hann á sínum tíma
„Sigurgeir var bráðskarpur, margfróður, minnugur og skemmtilegur. Hann var heiðarlegur, hreinskiptinn, hraðmæltur, hugsaði í lausnum og kom sér beint að efninu. En hann bjó einnig yfir mikilli hlýju í mannlegum samskiptum, ómetanlegri kímni og breiðu brosi sem lýsti upp menn og málefni. Ég þakka mínum kæra vini fyrir alla hans þjálfun, fararstjórn og leiðsögn í næstum sjö áratugi. Vinátta hans hefur verið mér mikil gæfa á lífsleiðinni.“
