„Ég vil fullyrða að allir Íslendingar þekki dæmi um atvinnubann og misbeitingu valds, ef ekki persónulega þá frá nánasta umhverfi,“ segir Kolfinna Baldvinsdóttir. Kolfinna segir að fátt komi á óvart í nýrri bók Ólínu Þorvarðardóttur, fyrrverandi þingkonu.
Bók Ólínu, Spegill fyrir Skuggabaldur – atvinnubann og misbeiting valds, hefur vakið talsverða athygli og lýsir Kolfinna sjálf eigin reynslu á opinskáan hátt í færslu á Facebook-síðu sinni. Kolfinna er dóttir Jóns Baldvins Hannibalssonar og Bryndísar Shcram og segist hún hafa fundið fyrir því á eigin skinni að hafa verið dóttir stjórnmálamanns sem „flokknum“ stóð stuggur af.
„Bara að finna sumarvinnu sem unglingur, velti á velvild atvinnurekenda gagnvart Alþýðuflokknum – eða óvild. Atvinnutækifæri móður minnar veltu líka á því – eins og hún lýsir í nýútkominni bók sinni “Brosað gegnum tárin”,“ segir Kolfinna og heldur áfram:
„Rétt eins og hún, var ég sjálf ráðin - og rekin - á þessum sömu forsendum: Ráðin hjá Stöð 2 til að sýna að sú stöð væri ekki of vilhöll “flokknum” en rekin líka til þess að þóknast “flokknum” þegar þar að kom. Ráðin hjá Rúv til að sýna að sú stöð gætti jafnræðis flokkslega, en rekin á sömu forsendum – eins og kom skýrlega fram í greinum Hannesar Hólmsteins á þessum tíma: hann kvartaði undan því að “of margir kratar” væru á skjánum í “sjónvarpi allra landsmanna”.“
Kolfinna segist engan veginn hafa gert sér grein fyrir því að líf hennar og atvinnutækifæri hafi verið undirorpin þessum forsendum. Hún hafi verið svo saklaus að hún hélt að hún væri einfaldlega hæf til starfsins, ung kona sem vildi bara hafa í sig og á. „Það var löngu síðar sem mér var einfaldlega sagt hvaða lögmál hefðu verið á ferðinni.“
Kolfinna segist hafa valið þann augljósa kost að flytja af landi brott. Veltir hún því fyrir sér hversu mikið íslenskt samfélag hefur liðið fyrir brottflutning allra þeirra sem hafa valið þennan sama kost - það var í raun efni í sérstaka rannsókn. Hún segir svo frá því hvernig hún kom alls staðar að lokuðum dyrum þegar hún sótti um áhugaverð störf á Íslandi.
„Hversu oft hef ég ekki sent mína ferilskrá til Íslands, þegar ég sá auglýst störf sem pössuðu við mína starfsreynslu (ævinlega án svara)? Einu sinni gekk ein ráðningarstofan svo langt að mælast til þess að ég strokaði út þriggja ára starfsreynslu mína hjá Evrópusambandinu. Yfirlýstir Evrópusambandssinnar eins og ég (sem hafði komið fram í mínum blaðaskrifum) kæmu ekki til greina. Þegar ég spurði hvað ég ætti þá að hafa verið að gera þessi þrjú ár, var svarið: Varstu ekki að eiga börn?“
Kolfinna segir að í bók sinni nefni Ólína nokkrar tillögur um hvernig hægt sé að sporna við þessu. Kolfinna hefur skoðanir á þeim leiðum og nefnir sérstaklega eina.
„Ég hefði líka viljað sjá hana draga kjósendur til ábyrgðar. Það eru þeir sem hafa kosið þennan flokk yfir sig og gert honum kleift að útskúfa og þagga niður í þeim sem hann hefur vanþóknun á. Hvað hefur það kostað íslenskt samfélag á lýðveldistímanum? Það er sérstakt rannsóknarefni.“
Það er fátt sem kemur á óvart í nýrri bók Ólínar "Spegill fyrir Skuggabaldur – atvinnubann og misbeiting valds”. Ég...
Posted by Kolfinna Baldvinsdóttir on Þriðjudagur, 13. október 2020