Kolbrún Baldursdóttir, borgarfulltrúi Flokk fólksins, er allt annað en sátt með með reglugerð um hollustuhætti og vill breyta henni.
„Mér blöskrar alveg stífleiki borgarinnar þegar óskað er eftir heimsókn hunda t.d. í skóla. Ég lýsti hneykslun minni í þessari bókun sem ég lagði fram í gær í borgarráði þegar fundargerð heilbrigðisnefndar var lögð fram,“ skrifar Kolbrún.
„Bókun Flokks fólksins undir liðnum fundargerð heilbrigðisnefndar frá 8. september 2022:
Sótt er um undanþágu fyrir heimsókn hunds í skólastofu eins skóla í borginni. Fulltrúi Flokks fólksins telur orðið brýnt að breyta reglugerð um hollustuhætti. Flækjustig og skriffinnska sem fylgir umsókn af þessu tagi er út í hött,“ heldur hún áfram.
„Sama gildir sé óskað eftir heimsókn hunda á hjúkrunarheimili ef því er að skipta. Hér er um að ræða heimsókn hunds tvisvar í viku í fáeinar klukkustundir í senn og skilyrðin sem sett eru eru með ólíkindum. Meðal skilyrða er t.d. sérstök leið fyrir hundinn út og inn, stofan þrifin hátt og lágt eftir heimsókn hundsins og sérstakar ráðstafanir vegna öryggismála. Reglugerð sem þessi er aftan úr fornöld og ekki borginni til sóma. Kominn er tími á að nútímavæðast þegar kemur að samskiptum við gæludýr í opinberum byggingum,“ skrifar Kolbrún að lokum.
