Kolbrún Bergþórsdóttir, menningarritstjóri á Fréttablaðinu, ritaði afar athyglisverðan leiðara í Fréttablaði dagsins í dag sem fjallaði um vanhæfni Eyþórs Arnalds sem oddvita Sjálfstæðismanna í borginni.
Vangaveltur hafa verið uppi um framtíð Eyþórs sem oddvita meðal sjálfstæðismanna í Reykjavík. Skiptar skoðanir eru á því hvort hann sé rétti maðurinn til þess að vera borgarstjórnarefni flokksins í sveitarstjórnarkosningunum í vor. Hann hyggst þó halda ótrauður áfram og er sannfærður um ágæti sitt. Það er Kolbrún Bergþórsdóttir ekki.
„Eyþór Arnalds lýsti því yfir á dögunum að hann vildi leiða lista Sjálfstæðisflokksins í borgarstjórnarkosningum á næsta ári. Sjálfsagt er þetta til marks um pólitískan metnað en um leið dæmi um ofmat stjórnmálamanns á sjálfum sér. Eyþór hefur ekki þann trúverðugleika sem stjórnmálamaður þarf ætli hann sér að ná til breiðs hóps kjósenda. Reyndar er ekki skrýtið að Eyþór skuli ekki átta sig á þessari staðreynd,“ segir Kolbrún.
Hún segir Samfylkinguna mega muna sinn fífil fegurri, en Dagur getur bjargað henni frá glötun: „Raunsætt mat á eigin getu vefst fyrir mörgum, líka stjórnmálamönnum. Staða borgarstjórans, Dags B. Eggertssonar, er mjög sterk og aðrir flokkar vilja ólmir vinna með honum. Ekki er ofmælt þegar fullyrt er að Dagur sé eina tromp Samfylkingarinnar – flokks sem er í mikilli tilvistarkreppu.“
Kolbrún segir að nær ómögulegt sé að velta Degi úr sessi: „Dagur á sína hatursmenn, sem verða nánast eins og litla andsetna stúlkan í The Exorcist þegar þeir heyra nafn hans nefnt; höfuð fer að snúast og formælingarnar streyma út úr þeim. Þetta er lítill hópur sem hefur hátt en ekkert mark er á honum takandi. Borgarstjórinn nýtur almennra vinsælda og erfitt verður að velta honum úr sessi. Kannski er það ómögulegt.“
Hún vill meina að það eina sem gæti komið í veg fyrir framlengingu á valdatíð Dags sé ef hann ákveður sjálfur að stíga frá: „Pólitískir andstæðingar hans hljóta að vona heitt og innilega að hann ákveði sjálfur að yfirgefa borgarmálin. Það er eiginlega þeirra eina von um völd í borginni. Brotthvarf Dags yrði um leið gríðarlegt áfall fyrir Samfylkinguna og gæti kostað enn eitt fylgishrunið hjá flokki sem má ekki við neinu.“
Kolbrún endar leiðarann á því að segja stöðu Eyþórs vonlausa: „Ekki blasir annað við en að Dagur haldi ótrauður áfram í borgarpólitíkinni. Eyþór Arnalds getur haldið áfram að vona en staða hans virðist nánast vonlaus.“
Ef Kolbrún hefur rétt fyrir sér er óhætt að segja að staða Eyþórs sé slæm. Tíminn einn mun leiða í ljós hvort hún reynist sannspá en Eyþór mun án vafa vilja sýna fram á annað.
