Heldur óskemmtileg sjón mætti Kolbeini Óttarssyni Proppé, þingmanni Vinstri grænna, þegar hann kom til sín af fundum í morgun. Einhver hafði laumað inn um bréfalúguna nokkrum pokum með hvítu dufti.
Eins og fjallað hefur verið um í fjölmiðlum í morgun var frumvarp Pírata um afnám refsinga við að hafa neysluskammta fíkniefna undir höndum fellt í þinginu í nótt. Kolbeinn er einn þeirra þingmanna sem sagði nei við frumvarpinu eins og vel flestir þingmenn ríkisstjórnarflokkanna. Nokkrir sátu þó hjá. Ekki liggur fyrir hvort fleiri þingmenn hafi fengið aðra eins sendingu inn á sitt heimili.
„Þetta beið mín þegar ég kom heim áðan af fundum. Ég verð að segja að ég hef fengið betri sendingar og vildi óska þess að fólk tjáði sig öðruvísi en á þennan hátt. En hingað erum við komin í pólitíkinni, það er einhvern veginn allt leyfilegt. Ég hygg að þetta sé nú bara lyftiduft eða eitthvað álíka, en ég held að það séu betri leiðir til að eiga skoðanaskipti en að setja hvítt duft inn í pokum inn um bréfalúgur.“
