Áttræð kona í Melbourne í Ástralíu er látin eftir alvarleg veikindi sem rakin eru til bakteríusýkingar. Konan hafði verið í dái í níu daga áður en hún lést.
Í fréttum ástralskra fjölmiðla kemur fram að konan hafi fengið heiftarlega sýkingu eftir að kötturinn hennar sleikti opið sár á henni. Grunur leikur á að baktería í munnvatni kattarins hafi valdið sýkingunni, en kettir geta borið bakteríua pasteurella sem getur valdið heilahimnubólgu. Þá eru dæmi þess að sýkingin geti komist í hjartað.
Í frétt Herald Sun kemur fram að læknar í Melbourne fái inn á borð til sín eitt tilfelli í viku að meðaltali vegna sýkingar af þessu tagi. Hvetja þeir þá sem eru viðkvæmir fyrir, til dæmis með viðkvæmt ónæmiskerfi, til að halda sig frá köttum.
Lindsay Grayson, sérfræðingur í smitsjúkdómum við Austin Health-sjúkrahúsið í Melbourne, segir að kattareigendur ættu ekki undir nokkrum kringumstæðum að leyfa dýrunum að sleikja opin sár. Raunar ættu þeir sem eldri eru eða með viðkvæmt ónæmiskerfi helst að sleppa því að vera nálægt þeim.
