„Ráðherrar Sjálfstæðisflokksins virðast líta á stjórnskipan landsins sem sinn flokkslega prívat leikvöll,“ segir Karl Th. Birgisson, ritstjóri Herðubreiðar, í pistli á vef sínum.
Þar gerir hann úrskurð yfirdeildar Mannréttindadómstóls Evrópu í Landsréttarmálinu svokallaða að umtalsefni. Eins og kunnugt er staðfesti yfirdeildin dóm réttarins í Landsréttarmálinu í fyrra.
Karl setur málið í samhengi við lekamálið sem varð til þess að Hanna Birna Kristjánsdóttir, þáverandi innanríkisráðherra, hrökklaðist frá völdum.
„Hanna Birna sagði réttilega af sér embætti enda mega dómsmálaráðherrar ekki hafa afskipti af rannsóknum lögreglunnar. Það er eiginlega mjög beisik. Nema hjá ráðherrum flokka sem líta á völd sem herfang og einkamál. Enda sagði Hanna Birna ekki af sér af því að hún hefði gert neitt rangt. Hún var fórnarlamb í ljótum pólitískum leik, að eigin sögn. Og miklu frekar af því að hún er kona,“ segir Karl meðal annars.
Hann fer svo yfir mál Sigríðar Andersen sem var dómsmálaráðherra þegar hún fékk það hlutverk að skipa dómara við nýtt dómstig í landinu, Landsrétt.
„Sigríður fékk til sín niðurstöður nefndar um hverjir væru hæfastir, en leizt ekkert á þær. Raunar heldur ekki sumum í Viðreisn, sem sátu þá með henni í ríkisstjórn. Afstaðan til dómskerfisins var nokkurn veginn þessi: Ég á þetta, ég má þetta,“ segir hann.
Eftirmálin þekkja eflaust flestir en lokahnykkurinn í málinu kom í gær.
„Skýr og klár brot. Grafalvarleg meiraðsegja. Hún hlustaði ekki á ítrekaðar viðvaranir frá ráðgjöfum sínum. Þetta er niðurstaða beggja dómstiga Mannréttindadómsstóls Evrópu. Samhljóða á efra stiginu,“ segir hann og vísar í viðbrögð Sigríðar í viðtali við Fréttablaðið í gær þess efnis að um „pólitískt at“ væri að ræða.
„Mannréttindadómstóll Evrópu er að senda skilaboð til valinkunnra alþjóðlegra flokkssystkina Sigríðar Andersen, sem ráða í kunnum lýðræðisríkjum á borð við Tyrkland, Ungverjaland og Pólland. Þar hafa ráðamenn nefnilega verið að skipa dómara eftir pólitískum hentugleikum rétt eins og Sigríður Andersen. Og Sjálfstæðis- og Framsóknarflokkur reyndar áratugum saman.“
Karl segir að það virðist ekki hvarfla að Sigríði í hvers konar félagsskap hún er með Erdogan Tyrklandsforseta og Orban forseta Ungverjalands og hvers vegna glöp hennar í embætti séu notuð til að láta þá vita að slík vinnubrögð séu ekki í lagi.
„Nei. Mannréttindadómstóll Evrópu er nefnilega að ráðast inn á prívatleikvöll Sjálfstæðisflokksins og þar með hennar. Þess vegna er niðurstaða hans pólitískt at. Gegn henni sjálfri persónulega í þokkabót. Og hún er náttúrlega fórnarlambið. Ekki réttarfarið í landinu.“