Karl Óskar Agnarsson, einn dyggasti stuðningsmaður KR, er látinn, 68 ára að aldri. Karl, eða Kalli eins og hann var alltaf kallaður, lést í fyrrakvöld á Landspítalanum.
Gylfi Dalmann Aðalsteinsson, formaður KR, minnist Kalla í fallegri grein á heimasíðu KR.
„Kalli var einn af okkar dyggustu stuðningsmönnum og sjálfboðaliðum. Í mörg ár sá hann um vallarklukkuna þegar strákarnir og stelpurnar voru að spila. Alltaf mættur löngu fyrir leiki, tók á móti okkur fagnandi sem voru að mæta á leiki, gjarnan með liðsuppstillinguna tilbúna á blaði til að sýna manni.“
Þá segir Gylfi að Kalli hafi oftar en ekki verið mættur í dyragættina til að taka við miðum þegar körfuboltadeildir félagsins voru að spila.
„Einnig var hann dyggur stuðningsmaður Píluvina KR og lét sig ekki vanta á viðburði Pílunnar. Hann tók líka þátt í getraunastarfi KR í gegnum tíðina. Árið 2012 þegar Kalli varð sextugur fékk hann sérstaka viðurkenningu fyrir sjálfboðaliðastarf sitt fyrir gamla góða KR,“ segir Gylfi í grein sinni og kveður góðan vin og félaga.
„Við KR-ingar minnumst Kalla með miklu þakklæti fyrir allt sem hann gerði fyrir gamla góða KR og þökkum honum samfylgdina í gegnum tíðina. KR-ingar senda ættingjum Kalla innilegar samúðarkveðjur.“