Karl Garðarsson, fyrrverandi þingmaður Framsóknarflokksins, segir hentistefnu ráða því hvernig ríkisborgararéttur er veittur á Alþingi.
„Fyrir nokkrum árum sat ég í nefnd þingsins sem hafði með málefni útlendinga að gera. Rétt fyrir þinglok fengum við afhentan lista yfir handvalda einstaklinga sem rétt þótti að teknir væru fram fyrir aðra sem biðu eftir ríkisborgararétti. Á listanum mátti sjá íþróttamenn, sem greinilega þóttu merkilegri en almennir umsækjendur, auk fólks sem taldi sig eiga rétt á meira réttlæti en aðrir sem beðið höfðu svo árum skipti á biðlistum Útlendingastofnunar,“ skrifar Karl á Facebook.
„Engin umræða fór fram í nefndinni um einstaklingana sem voru á listanum, enda voru þinglok handan hornsins og enginn tími til að fjalla um málið. Listinn var því samþykktur án umræðu. Vissulega koma margir útlendingar hingað til lands sem hafa átt mjög erfitt og þarfnast sérstakrar hjálpar og stuðnings. Þá hjálp eigum við að veita. Það að veita ríkisborgararétt verður hins vegar að fylgja ákveðnum reglum sem mega ekki ráðast af hentistefnu stjórnmálaflokka eða einstakra þingmanna,“ heldur hann áfram og segir sérstakt að sumir dásama kerfið.
„Þetta er spillt kerfi þar sem gert er upp á milli fólks. Hér höfum við þingmann Pírata sem dásamar kerfið og krefst þess að kjörnir fulltrúar geti haldið áfram að vera með puttana í því hverjir eru útvaldir,“ skrifar Karl að lokum.