„Okkar skoðun er sú að öll framkoma þín og heilbrigðismálaráðherra gagnvart ÍE í þessu máli hafi markast af virðingarleysi fyrir okkur, framlagi okkar og því verkefni sem við höfum tekið að okkur í þessum faraldri.“
Þetta segir Kári Stefánsson, forstjóri Íslenskrar erfðagreiningar, í aðsendri grein á vef Vísis. Þar tilkynnir Kári að fyrirtækið sé hætt að skima fyrir kórónuveirunni sem veldur COVID-19.
Kári birtir afrit af bréfi sem hann sendi Katrínu Jakobsdóttur forsætisráðherra þann 1. júlí síðastliðinn. Þar sagði Kári að nú væri svo komið að Íslensk erfðagreining gæti ekki sinnt skimunum mikið lengur, meðal annars vegna þess að fyrirtækið hefur önnur verk að vinna.
„Þess vegna þarf að búa til nýtt afl innan íslensks heilbrigðiskerfis til þess að höndla þetta, Faraldsfræðistofnun Íslands. Hún þarf að búa að sameindalíffræði, tölfræði, stærðfræði, smitsjúkdómafræði og ákveðinni getu til þess að hreyfa verkefni hratt og ákveðið,“ sagði Kári í bréfinu.
Svo virðist sem hann hafi ekki verið sáttur við það svar sem Katrín Jakobsdóttir gaf honum. Þar sagði Katrín að ríkisstjórnin myndi taka það til skoðunar og frekari úrvinnslu tillögu hans um sérstaka stofnun á þessu sviði. Því hafi verið ákveðið að ráða verkefnastjóra undir yfirstjórn sóttvarnalæknis sem yrði falið að skila tillögum til ríkisstjórnarinnar eigi síðar en 15. september næstkomandi.
Í grein sinni segir Kári að það sé ljóst á svari Katrínar að fyrir henni sé þetta vandamál ekki eins brátt og þeim.
„Þú gengur út frá því sem vísu að við ætlum að halda áfram að sinna skimuninni án þess að hafa nokkurn skapaðan hlut með það að gera hvernig að henni er staðið sem heild í hugsun og verki. Og það sem meira er þér liggur ekkert á að setja saman apparat til þess að taka við af okkur. Þetta gengur einfaldlega ekki,“ segir Kári og bætir við að þeir hjá Íslenskri erfðagreiningu séu viss um að það sé enginn aðili í landinu sem kunni betur til þeirra verka sem fyrirtækið hefur tekið að sér.
„Þú ert hins vegar á þeirri skoðun að þú hafir verkefnastjóra sem gæti búið til á þessu betri skilning og hjálpað til við að koma þjóðinni áfram til framtíðarskipulags. Okkar skoðun er sú að öll framkoma þín og heilbrigðismálaráðherra gagnvart ÍE í þessu máli hafi markast af virðingarleysi fyrir okkur, framlagi okkar og því verkefni sem við höfum tekið að okkur í þessum faraldri. Þetta er einfaldlega okkar skoðun og það má vel vera að hún sé byggð á ofmati okkar á okkur sjálfum. Það væri svo sem ekki í fyrsta skiptið sem við ofmætum okkur. Þannig fer nefnilega hégómleiki manna gjarnan með þá en ég er alls ekki að ætlast til þess að þú kannist við það. En nú er okkar þátttöku lokið og engin ástæða til þess að erfa það sem orðið er. Við erum búin að skima eftir SARS-CoV-2 í 72452 einstaklingum meðan Landspítalinn skimaði í 15408. Við erum búin leggja okkar að mörkum og kominn tími til þess að við förum að sinna dagvinnu okkar og engu öðru. Frá og með deginum í dag 6. júlí munum við hætta öllum samskiptum við sóttvarnarlækni og landlækni út af SARS-CoV-2. Síðustu sýnin sem við munum afgreiða eru þau sem berast til okkar á mánudaginn 13. júlí.“
Grein Kára má lesa í heild sinni hér.