„Mann setur hljóðan þegar fréttir berast af því að Ísland fær verstu spillingareinkunn af Norðurlöndum. „Hvar er þessi spilling?“ spyr maður. Er hún kannski miklu nær, bara akkúrat hérna heima í Grindavík?“
Þetta segir Kári Guðmundsson, veitingamaður í Grindavík og félagsmaður í Sjómanna- og vélstjórafélagi Grindavíkur, í aðsendri grein í Morgunblaðinu í dag.
Í grein sinni heldur Kári því fram að einhvers konar spilling hafi ráðið því hver fékk að hefja rekstur í Sjómannastofunni Vör í Grindavík. Kári bendir á að um sé að ræða sögufrægan stað, en þeir sem muna eftir Stuðmannamyndinni Með allt á hreinu muna kannski eftir því að Stuðmenn borðuðu hamborgara og franskar í sjoppunni eins og Kári rifjar upp.
Kári segir að lengi vel hafi stofan verið eini staðurinn í Grindavík þar sem hægt var að setjast niður og kaupa sér mat. Nú séu hins vegar aðrir tímar og mikið vatn runnið til sjávar síðan.
„Í Grindavík hefur á síðustu árum orðið til þó nokkuð af veitingastöðum sem bjóða fínt úrval af góðum mat. Allir geta fundið sér gott að borða í Grindavík, hvort sem menn vilja grænmetisrétti, hamborgara, steikur, pizzur eða ljúffengan fisk. Viðbrögð heimamanna og annarra gesta sem koma hvaðanæva úr heiminum hafa verið mjög jákvæð. Þær fjölskyldur sem standa á bak við þennan fjölbreytta rekstur leggja mikið á sig með metnað og ástríðu að vopni við það að bjóða upp á góðan mat í harðri samkeppni,“ segir Kári og bætir við að samkeppni sé af hinu góða svo lengi sem jafnt er gefið.
„Nú eru komnir nýir rekstraraðilar á Sjómannsstofunni Vör við Hafnargötu,“ segir Kári og spyr hvort það sé ekki bara gott mál.
„Húsið hefur fengið töluverða yfirhalningu enda framkvæmdir löngu tímabærar að sögn Einars Hannesar Harðarsonar, formanns Sjómanna- og vélstjórafélags Grindavíkur, á vef Grindavíkur, en félagið á húsið og leigir út reksturinn.“
Kári segir að það sem veki athygli og jafnvel furðu er það að besti vinur formannsins hafi fengið að leigja staðinn án þess að aðrir fengju tækifæri á að leggja inn tilboð.
„Engin leið er betri en opið útboð til að tryggja hagsmuni Sjómanna- og vélstjórafélags Grindavíkur til að fá sem mest fyrir sína eign. Þess í stað er staðurinn leigður út langt undir markaðsvirði og með 15 til 20 milljóna króna meðgjöf frá Sjómanna- og vélstjórafélagi Grindavíkur til leigutaka, í formi yfirhalningar á löngu tímabærum framkvæmdum að sögn formannsins.“
Kári segir að vert sé að athuga að framkvæmdir felast ekki í endurbótum á þaki eða veggjum fasteignarinnar heldur uppfærslu á búnaði og tækjum fyrir veitingarekstur á samkeppnismarkaði.
„Í því felst gríðarleg skekkja fyrir rekstraraðila veitingahúsa að nýr rekstraraðili leigir húsnæði og tækjabúnað fyrir algjöra lágmarks fjárhæð. Áréttað skal að leigan grípur ekki einungis húsakostinn heldur líka allt sem þarf til að reka veitingahús; diska, potta, rándýr tæki og tól alls konar. Fær Sjómanna- og vélstjórafélagið þessa fjárfestingu til baka? Nei, við blasir að það eru engar líkur á því vegna þess að samið hefur verið til langtíma undir markaðsvirði.“
Kári segir að staðurinn sé stórglæsilegur og opnaður aftur eftir endurbæturnar með því að bjóða upp á hádegisverðarhlaðborð og fleira. Þetta sé vitanlega gert í samkeppni við aðra veitingamenn í Grindavík sem þurfa að standa skil á öllu sínu og fjármagna sínar framkvæmdir sjálfir.
„Er eðlilegt að ný og endurbætt samkeppni í veitingarekstri sé fjármögnuð af Sjómanna- og vélstjórafélagi Grindavíkur? Vita félagsmenn af ráðahagnum? Vita félagsmenn að ráðabrugg sem þetta er í engu samræmi við tilgang félagsins í 2. gr. laga þess? Gera félagsmenn sér grein fyrir því að það hefði örugglega fengist hærra verð fyrir fjárfestinguna með því að bjóða fleirum en besta vini formannsins einum að kjötkötlunum? Mann setur hljóðan þegar fréttir berast af því að Ísland fær verstu spillingareinkunn af Norðurlöndum. „Hvar er þessi spilling?“ spyr maður. Er hún kannski miklu nær, bara akkúrat hérna heima í Grindavík