Lögreglan á höfuðborgarsvæðinu tókst á við fjölbreytt verkefni síðastliðinn sólarhringinn en 88 mál voru bókuð á milli klukkan 17:00 og 05:00 í nótt. Meðal annars var óskað eftir aðstoð lögreglu við að vísa ölvuðum manni úr strætisvagni rétt eftir klukkan hálf sex í gærkvöldi.
Yfirbugaðir af lögreglu
Þá var tilkynnt um mann með hníf við skemmtistað í miðborginni rétt fyrir miðnætti. Hafði sá reynt að veitast að öðrum manni með hnífnum.
Þegar lögreglu bar að garði reyndi maðurinn að komast undan en var yfirbugaður af lögreglumönnum sem beittu varnarúða. Maðurinn var í kjölfarið vistaður í fangaklefa.
Þá barst tilkynning fyrr um kvöldið um mann í annarlegu ástandi en sá var grunaður um þjófnað í miðbænum. Maðurinn var handtekinn og streittist hann á móti í handtöku að sögn lögreglu. Maðurinn reyndist vera með hníf í buxnavasa sínum og var vistaður í fangaklefa yfir nótt.
Hávaði í heimahúsum
Lögreglan í Kópavogi og Breiðholti sinnti mest megnis verkefnum sem tengdust samkvæmishávaða í heimahúsum en á annan tug tilkynninga um hávaða bárust lögreglu í nótt.