„Ég held að það geti alveg hæglega gerst,“ segir Vilhjálmur Birgisson, varaforseti ASÍ, í samtali við Hringbraut þegar hann er spurður hvort hann eigi von á verðbólguskoti.
Vilhjálmur og Ragnar Þór Ingólfsson, formaður VR, sendu frá sér yfirlýsingu í hádegi þar sem þeir skoruðu á stjórnvöld að frysta tafarlaust vísitölu neysluverðs til verðtryggingar. Þannig yrði komið til móts við heimilin í landinu sem eru með verðtryggð húsnæðislán.
Áhrifa COVID-19 er farið að gæta í efnahagslífinu og viðbúið er að áhrifin muni aðeins aukast eftir því sem útbreiðsla veirunnar verður meiri. Í samtali við Hringbraut bendir Vilhjálmur á gengi krónunnar hafi veikst að undanförnu. Nemur veikingin í dag gagnvart evru til dæmis 2,14 prósentum og 2,70 prósentum gagnvart Bandaríkjadollar.
Vilhjálmur segir að fordæmi séu fyrir því að verðbólguskot hafi komið hér á landi í kjölfar falls krónunnar. „Við höfum fordæmi fyrir því úr hruninu þar sem að lánin stökkbreyttust eftir að gengið féll.“
Aðspurður segir Vilhjálmur að þetta gæti verið tímabundin ráðstöfun þar sem stjórnvöld gætu hlíft heimilum landsins við mögulega þungu höggi.
„Þetta eru fordæmalausar aðstæður sem eru að teiknast upp og nú verða menn bara að læra af gömlum mistökum sem menn gerðu á sínum tíma og láta þau ekki endurtaka sig. Nú verða allir sem einn að standa saman og tryggja allt sem hægt er að tryggja.“
Vilhjálmur segir einnig ljóst að innstreymi fjármagns í landið mun dragast saman í ljósi fækkunar ferðamanna. Donald Trump Bandaríkjaforseti tilkynnti í gærkvöldi að 30 daga bann yrði sett á flugferðir frá þeim ríkjum Evrópu sem eru aðilar að Schengen-samstarfinu. Vilhjálmur segir að þessi staðreynd geti einnig haft mjög neikvæð áhrif á gengi krónunnar.
„Við svona fordæmalausar aðstæður verða menn að grípa til róttækra aðgerða. Það er bara þannig.“