Jónína Benediktsdóttir, íþróttafræðingur, athafnakona og samfélagsrýnir, hjólar í Miðflokkinn vegna þeirrar ákvörðunar flokksins að leggja niður varaformannsembættið.
Greint var frá því um helgina að embættið hefði verið lagt niður á aukalandsþingi Miðflokksins sem haldið var á laugardag. Vigdís var ein í framboði til varaformanns en áður en gengið var til kosninga var ákveðið að leggja stöðuna niður. Litu margir svo á að það hefði verið gert til að koma í veg fyrir að Vigdís kæmist hærra í valdastiganum innan flokksins.
Jónína er langt því frá sátt við þessa ákvörðun og segir hana einhverja verstu PR-ákvörðun í íslenskum stjórnmálum lengi vel.
„Vigdís reis upp og gekk úr Framsókn til liðs við Miðflokkinn með formanninum, hún var fæld úr þinginu því hún var óþægilega gagnsæ og allt gert til þess að lítillækka þessa dugnaðar konu. Hún tók á sig að upplýsa Reykvíkinga um siðleysi fjármála borgarinnar, hún ætlaði síðan að gera Klaustursmönnum greiða og leiðrétta ímynd þeirra, sem er ógeðsleg, með því að bjóða sig fram sem varaformaður flokksins, en o nei guttarnir leggja niður embættið,“ segir hún og bætir við:
„Versta PR ákvörðun stjórnmála í langan tíma því hún er augljós og útsmogin, þeir vilja ekki Vigdísi því hún er klárari en þeir.“
Jónína veltir fyrir sér hvort kalla megi Miðflokkinn karlaflokk. Hvað sem því líður gefur hún flokknum ekki háa einkunn. „Eitthvað úrkynjað á sér stað í Miðflokknum, sennilega halda þeir að allar konur séu einfaldlega til eins brúks og að þeirra hlutverk sé að misbjóða konum og ná kjósendum þannig. Þá er að finna nýjan flokk Miðflokkskonur, við erum ekki slíkar að láta svona karlapólitík yfir okkur ganga. Sjaldan launa karl-kálfar ofeldið.“