„Mér sýnist tveggja metra-reglan vera alveg fallin úr gildi. Meðal alls þorra fólks. Erum við hætt að hlusta á þríeykið?“
Þessari spurningu varpar Jón Viðar Jónsson, helsti leikhúsgagnrýnandi þjóðarinnar, fram á Facebook-síðu sinni. Þessi orð Jóns Viðars koma ekki til af ástæðulausu enda sagði Þórólfur Guðnason sóttvarnalæknir, á upplýsingafundi almannavarnadeildar ríkislögreglustjóra í gær, að fólk væri farið að slaka mjög, mjög mikið á.
Þegar COVID-19-faraldurinn stóð sem hæst hér á landi voru flestir sem hugðu að reglulegum handþvotti og virtu tveggja metra regluna. Þegar draga fór úr útbreiðslu veirunnar fóru margir að slaka á og virðist staðan nú vera þannig að veiran sé að ná sér á strik. Í gær voru fjögur virk smit á landinu og yfir 440 manns í sóttkví.
Nokkrar umræður hafa spunnist um málið á Facebook-síðu Jóns Viðars og virðast margir taka undir það að fólk sé hætt að virða tveggja metra regluna. „Því miður er eitthvað kæruleysi í gangi. Það þurfa allir að passa sig,“ segir einn í umræðunum og annar bætir við að ekki sé langt í að næsta bylgja komi.
Hvað segja lesendur? Er það upplifun ykkar að fólk sé að hætt að hlusta á þríeykið?