Minnstu mátti muna að viðskiptavinur bakarís félli við þegar hann hrökklaðist út úr bakaríi á dögunum. Þetta segir Jón Jósafat Björnsson, framkvæmdastjóri Dale Carnegie á Íslandi, í aðsendri grein sem birtist á vef Vísis í dag.
„Fyrir nokkrum dögum var ég staddur í bakaríi ásamt 11 öðrum þegar viðskiptavinur númer 13 gerði sig líklegan til að koma inn. Um leið og hann opnar hurðina hrópar starfsmaður bakarísins „út út.......þú verður að fara út......það eru of margir hér inni“.
Jón segir að viðskiptavininum, karlmanni á efri árum, hafi brugðið mjög við þetta. Bætir hann við að á þessum tímapunkti hafi honum orðið fullkomlega ljóst að starfsfólki bakarísins var mjög umhugað um sóttvarnir.
„Óljósara var hvort upplifun viðskiptavinarins skipti jafn miklu máli. Undanfarna mánuði hefur fólk í framlínu fengið það hlutverk að fylgja eftir reglum stjórnvalda sem hafa verið misskýrar og tekið tíðum breytingum. Flugfreyjur og flugþjónar hafa ólíkt öðrum starfsstéttum lengi gætt öryggis farþega en um leið að tryggt ánægju þeirra og upplifun.“
Jón segist hafa velt fyrir sér, meðan hann beið eftir að röðin kæmi að honum, hvernig stjórnendur viðkomandi fyrirtækis hafi þjálfað starfsfólk sitt í þessu nýja hlutverki og hvort það hefði yfirleitt fengið einhverja þjálfun.
„Nú þegar við förum að sjá fyrir endann á Covid aukast væntingar okkar að ferðamönnum fjölgi með haustinu. Víða heyrist að við ættum að horfa meira á gæði ferðamanna en magn þ.e.a.s. að laða til okkar ferðamenn sem skilja meiri peninga eftir. Í þeirri umræðu ættum við að hafa hugfast að ferðamenn sem eyða miklu gera líka miklar kröfur um gæði og góða þjónustu,“ segir Jón sem endar grein sína á þessum orðum:
„Ef við viljum að Ísland verði ,,hágæða vara“ í augum ferðamanna þarf hver og einn að standa klár á sínu hlutverki. Til að sinna starfi sínu vel þarf hæfni að vera til staðar og hún fæst með þekkingu og þjálfun.“
