Jón Þórisson verður forstjóri Torgs

Jón Þórisson hefur tekið til starfa sem forstjóri Torgs, útgáfufélags Féttablaðsins, DV og Hringbrautar og tengdra miðla. Hann er lögfræðingur frá Háskóla Íslands og var aðalritstjóri miðla Torgs þar til í ágúst á síðasta ári og er varastjórnarmaður í félaginu. Hann er því flestum hnútum kunnugur innan þess.

„Þó nærri hálft ár sé liðið síðan ég hvarf héðan á braut hefur tíminn liðið eins og örskot við lögfræðiráðgjöf og tengd verkefni. Nú kem ég hingað til starfa á ný í en öðru hlutverki,“ segir Jón.

„Engum dylst að fjölmiðlarekstur hérlendis er krefjandi verkefni. Ég hlakka til að takast á við það með því hæfileikaríka og dugmikla fólki sem ég veit af eigin raun að hér starfar.“

Jón tekur við starfinu af Birni Víglundssyni, en hann sagði starfi sínu lausu í nóvember s.l. Björn mun þó vera fyrirtækinu innan handar næstu mánuði og starfa við sérgreind verkefni.

“Ég er þakklátur fyrir tíma minn hjá Torgi og hef átt einkar ánægjulegt samstarf við bæði stjórn félagsins og starfsmenn þess. Um leið og ég óska félaginu og nýjum forstjóra alls hins besta vil ég þakka starfsfólki Torgs fyrir ánægjulegt samstarf,” segir Björn.

„Um leið og ég þakka Birni einstaklega gott samstarf býð ég Jón velkominn til starfa ,“ segir Helgi Magnússon stjórnarformaður Torgs.