Jón Ingi skorar á fyrirtæki landsins: „Kurteisi kostar ekkert“

Jón Ingi Hákonarson, bæjarfulltrúi Viðreisnar í Hafnarfirði, hefur sent áskorun á fyrirtæki landsins í því atvinnuástandi sem nú ríkir.

Jón Ingi bendir á að þúsundir landsmanna séu að sækja um auglýst störf um þessar mundir og það örli á því að fyrirtæki hafi ekki fyrir því að svara fólki.

„Það að fá engin viðbrögð við áhuga sínum á starfi er niðurbrjótandi og dregur kraftinn úr atvinnuleitendum,“ segir Jón Ingi í grein sem birtist á vef Vísis í morgun.

Hann skorar því á fyrirtæki landsins að sýna atvinnuleitendum þann sóma að svara öllum umsóknum.

„Þetta þarf ekki að vera flókið, staðlaður tölvupóstur er betra en ekki neitt. Fólk sem hefur varið tíma sínum í það að kynna sér fyrirtækið og vanda til umsóknar á skilið að því sé sýnd sú virðing að umsókninni sé svarað og þakkað sé fyrir auðsýndan áhuga,“ segir hann.

Hann segir að þetta sé ekki bara spurning um almenna kurteisi og mannasiði heldur sé þetta líklega ódýrasta og skilvirkasta markaðsaðgerð sem fyrirtæki getur farið í.

„Umsækjendur eru viðskiptavinir og neytendur og því hlýtur það að vera í þágu fyrirtækisins að koma í veg fyrir það að atvinnuleitendur fái neikvæða mynd af fyrirtækinu.“

Jón Ingi segir að mörg fyrirtæki standi sig vel hvað þetta varðar og eiga hrós skilið en því miður sé enn langt í land.

„Það er kúnst að hafna fólki en viðhalda góðum viðskiptatengslum. Kurteisi kostar ekkert.“