Heldur óvanaleg sjón blasti við fjórum ritstjórnarmeðlimum DV í dag er þeir gengu eftir Lækjargötunni á leið sinni aftur á skrifstofu DV eftir hádegismat. Þar eru fjölfarin gatnamót og vakti það athygli þeirra er sírenuljós fóru í gang og lögregla stöðvaði för ökumanns beint fyrir framan verslun H&M. Björn Þorfinnsson ritstjóri DV skrifar um atvikið á sinn einstaka hátt á vef miðilsins.
„Sá fremsti í röðinni rétt náði að muldra: „Bíddu, eru þetta ekki Jón Baldvin og Bryndís“. Aðrir ritstjórnarmeðlimir voru sneggri að hugsa og skyndilega voru þrír símar með myndavélum komnir á loft til að skrásetja atburðinn kyrfilega.“
Jón Baldvin sannarlega undir stýri
Hjónin Jón Baldvin Hannibalsson og Bryndís Schram hafa verið mikið í fjölmiðlum undanfarið og ekkert lát virðist ætla að vera á því þar sem undir stýri var ráðherrann fyrrverandi og eiginkona hans honum við hlið.
„Að mati nefndarinnar, sem reyndar enginn veit hvernig er skipuð, hlýtur það því að vera heiðarleg atlaga að Íslandsmeti í óheppni að þjóðþekktur maður, eins og Jón Baldvin, sé stöðvaður af sírenublikkandi lögreglunni tveimur metrum fyrir framan hálfa ritstjórn DV.
Fyrir hvað ráðherrann fyrrverandi var stöðvaður liggur ekki fyrir á þessari stundu. Viðræður hans við lögregluna tóku þó talsverðan tíma og hann þurfti að framvísa skilríkjum eins og von er. Hvort að hann var sektaður fyrir eitthvað umferðarlagabrot er ekki ljóst en ef svo var þá var brotið fremur léttvægt.“
