„Það er auðvelt að kaffæra fámenna Ísland á stuttum tíma ef fjöldi fólks þar í landi fær þau skilaboð að þeir sem komast inn í landið fái að vera hér það sem eftir er þessvegna á kostnað skattgreiðenda ef ekki vill betur.“
Þetta segir Jón Magnússon, hæstaréttarlögmaður og fyrrverandi þingmaður, á vef sínum um mál egypsku fjölskyldunnar sem er í felum hér á landi. Til stóð að framfylgja brottvísun fjölskyldunnar í gærmorgun en stoðdeild ríkislögreglustjóra kom að tómum kofanum þegar sækja átti fjölskylduna.
Jón segir að ákvörðun hafi verið tekin af löglegum yfirvöldum um að vísa fjölskyldunni úr landi í samræmi við íslensk lög og alþjóðalög.
„Ljóst var frá upphafi, að egypska fjölskyldan átti ekki rétt á alþjóðlegri vernd, en með fölskum málatilbúnaði og hatrammri varnarbaráttu lögmanns fjölskyldunnar var málið teygt og togað og dregið þannig að niðurstaða lá loks fyrir 15. nóvember 2019. Fjölskyldan átti þá að fara brott. Sú staðreynd að hún skyldi ekki fara var alfarið á hennar ábyrgð ekki annarra,“ segir Jón.
Hann bendir á að málið hafi verið tekið upp í nefnd Alþingis og ýmsir hafi haldið því fram að verið sé að brjóta á fjölskyldunni, „þó engin lög eða reglur séu færðar fram því til staðfestingar.“
Jón veltir því upp hvort ekki sé rétt að taka upp umræðu um að breyta lögum og verkferlum þannig að þeim sem vísað er úr landi séu fluttir úr landi strax eftir að lokaúrskurður er genginn í máli þeirra.
„Núverandi verklag býður upp á almannahættu eins og dæmin sýna erlendis frá. Meðal annarra orða íbúar Egyptalands eru 90 milljónir og helmingur þjóðarinnar 45 milljónir eru undir 25 ára aldri. Það er auðvelt að kaffæra fámenna Ísland á stuttum tíma ef fjöldi fólks þar í landi fær þau skilaboð að þeir sem komast inn í landið fái að vera hér það sem eftir er þessvegna á kostnað skattgreiðenda ef ekki vill betur.“