„Ég frétti í dag að göngumaður, sem hefur verið að labba á svæðinu sem ég ætlaði að fara næstu daga, var drepinn af skógarbirni. Líklega á meðan hann svaf í tjaldi,“ segir Jón Ágúst Guðmundsson, ævintýramaður sem freistar þess nú að komast á reiðhjóli þvert yfir Bandaríkin.
Leiðin sem Jón Eggert fer kallast Trans American Rail og liggur þvert yfir Bandaríkin, frá Norður-Karólínu til Portland í Oregon. Hann áætlar að verða kominn til Denver í Colorado í nóvembermánuði og klára svo ferðina á næsta ári með því að hjóla frá Denver til Portland í Oregon.
Bandarískir fjölmiðlar greindu frá því á dögunum að skógarbjörn hefði verið drepinn í Great Smoky Montains-þjóðgarðinum í Norður-Karólínu á föstudag, en grunur leikur á að hann hafi drepið mann á svæðinu. Var björninn að gæða sér á líkamsleifum þegar hann var skotinn.
Jón Eggert hefur verið á svipuðum slóðum og umræddur harmleikur varð og vill hann ekki taka neina óþarfa áhættu. Ákvað hann þess vegna að leigja sér bílaleigubíl og keyra til smábæjar suður af Memphis í Tennessee. Leggur hann í þá ferð á morgun.
„Þá losna ég við skógarbirni og mun losna við leifar af fellibyljum sem eru að ganga á land við Mexíkóflóa núna,“ segir hann.
Jón lagði af stað frá Norður-Karólínu þann 31. ágúst síðastliðinn og hefur hann því verið rétt rúman hálfan mánuð á ferðinni.
Leiðin sem Jón Eggert fer á reiðhjóli hefur verið vinsæl með mótorhjólamanna en síður meðal reiðhjólamanna. „Hún er það tæknilega erfið fyrir reiðhjól að fáir reiðhjólamenn hafa farið þessa leið. Enginn hefur til dæmis farið hana einsamall og ég verð þá sá eini ef þetta tekst,“ sagði Jón Eggert við Fréttablaðið í ágústmánuði.