„Við kaupum bara þessa vagna með þessu gleri sem er sett í þá, þetta er örugglega einhver sólarvörn, Mér dettur það helst í hug,“ segir Jóhannes S. Rúnarsson, framkvæmdastjóri Strætó, í samtali við Hringbraut.
Vigdís Hauksdóttir, borgarfulltrúi Miðflokksins, sagði frá því á Facebook í morgun að hún hefði fengið fyrirspurn um það hvers vegna búið væri að setja dökkt gler í strætisvagna og hvort það væri til að það myndi ekki sjást hvað eru fáir um borð.
„Þetta er nefnilega mjög góð spurning - hvers vegna var gripið til þess ráðs? Varla getur það verið til þess að hlífa þeim sem þurfa að nota þetta úrræði - því það á jú að koma okkur öllum upp í strætó,“ sagði Vigdís en Jóhannes segir að ekki sé búið að grípa til neinna ráðstafana og setja dekkri rúður. „Þeir hafa bara komið svona til okkar,“ segir hann.
Vigdís lét þessi orð falla í færslu þar sem hún tjáði sig um rökræður þeirra Sigurborgar Óskar Haraldsdóttur, borgarfulltrúa Pírata og formanns skipulags- og samgönguiráðs, og Ólafs Guðmundssonar, varaborgarfulltrúa Sjálfstæðisflokksins, í Bítinu á Bylgjunni í morgun. DV fjallaði um málið.
Þar tókust þau á um borgarlínu og strætó og sagði Ólafur að miklu fjármagni hafi verið veitt til Strætó til að efla almenningssamgöngur. Það hafi ekki gengið eftir. Sigurborg sagði á móti að farþegum hefði fjölgað.
„Það voru 4 prósent 2012 og það eru rúm 4 prósent núna og þó þú segir 5 prósent þá eru það ekki 8 prósent eins og að var stefnt. Þannig að ég kalla það ekki árangur,“ sagði Ólafur.
Hringbraut spurði Jóhannes út í það hvernig hefði gengið hjá Strætó nú þegar frekari samkomutakmarkanir hafa verið felldar úr gildi. „Við erum að vinna í að taka saman tölur þannig að ég er ekki alveg með það á hreinu, tilfinningin er að þetta sé samt að aukast hægt og rólega.“