„Mér hefur fundist of hart gengið fram í sóttkvíarmálum hér á landi þar sem menn eru settir í sóttkví við minnsta tilefni,“ segir Jóhannes Loftsson, formaður Frjálshyggjufélagsins, í samtali við Morgunblaðið í dag.
DV greindi frá því um helgina að Frjálshyggjufélagið undirbúi nú mótmæli vegna aðgerða yfirvalda í kórónuveirufaraldrinum. Telur hann að samkomutakmarkanir og hömlur á atvinnustarfsemi hafi gert meira ógagn en gagn hér á landi.
Í frétt Morgunblaðsins í dag segist Jóhannes horfa til Svíþjóðar sem fyrirmyndar – og það þrátt fyrir að fjöldi smita þar sé margfaldur á við það sem gengur og gerist á hinum Norðurlöndunum.
„Það sem ruglar allan samanburð við Svía er að þeir klikkuðu á að stöðva útbreiðslu á spítölum og heilbrigðisstarfsfólk fékk ekki nægan útbúnað,“ segir hann.
Jóhannes kveðst þeirrar skoðunar að ef tekin er upp refsistefna gegn því að veikjast verði það til þess að fólk verði latara við að leita sér lækninga. Þá er hann mótfallinn öllu samkomubanni. Hann segir að meta þurfi skaðann sem hefur áhrif á hagkerfið og þar með heilbrigðisþjónustuna á næstu árum.
Jóhannes segir að enn sé verið að skipuleggja mótmælin en ekki liggur fyrir hvar eða hvenær þau verða haldin.
