Hjón, sem komin eru að eftirlaunaaldri, og reka lítið fjölskylduhótel fjarri höfuðborginni sjá fram á gjaldþrot þess. Verði það að veruleika mun það soga til sín eignir þeirra ofan í gjaldþrotið en hjónin áttu innan við tvö 200 þúsund krónur á bankareikningi um síðustu mánaðamót.
Þetta segir Jóhannes Þór Skúlason, framkvæmdastjóri Samtaka ferðaþjónustunnar, í pistli á Facebook-síðu sinni. Þar birtir hann nokkrar örsögur úr ferðaþjónustunni og er sagan hér að ofan ein þeirra. Hann segir að sögur sem þessar séu allar að gerast þessa dagana og eru í raun sýnishorn af þeim símtölum sem hann fær á hverjum degi.
„Leiðsögumaður sem rekur lítið ferðaþjónustufyrirtæki með konunni sinni og þurfti að fara á atvinnuleysisbætur strax í vor datt af tekjutengdu bótunum í lok ágúst. Hann fær ekki framlengingu tekjutengdu bótanna úr þremur í sex mánuði því að þær gilda bara frá 1. september, nokkrum dögum eftir að hann datt af þeim.“
„Hjón sem reka lítið jeppaferðafyrirtæki á Suðurlandi sjá fram á að missa eigur fyrirtækisins og vera tekjulaus á atvinnuleysisbótum í vetur. Fyrirtækið sem hefur staðið undir lifibrauði fjölskyldunnar er án aðstoðar líklega búið að vera. Heimili fjölskyldunnar er veðsett fyrir fjárfestingum fyrirtækisins. Þau vita ekki hvað tekur við.“
„Hjón sem reka lítið gistiheimili á landsbyggðinni lækkuðu sín eigin laun verulega strax í vor til að geta greitt starfsfólkinu sínu full laun samkvæmt samningum. Þau svo þurftu að segja fólki upp og fara sjálf á atvinnuleysisbætur í ágúst - en af því þau voru búin að lækka launin sín þá eiga þau mjög skertan bótarétt - fá ekki nema um 100 þúsund krónur hvort á mánuði. Þau vita ekki hvernig þau eiga að komast í gegn um veturinn. Þetta er að gerast í sambærilegum fjölskyldufyrirtækjum um allt land.“
Jóhannes segir að þetta fólk sé ferðaþjónustan og það og mikill fjöldi annarra einstaklinga í sömu stöðu þurfi aðstoð.
„86% af öllum ferðaþjónustufyrirtækjum eru svona fyrirtæki - lítil fyrirtæki með innan við 10 starfsmenn. Þetta eru fyrirtækin sem hafa byggt upp ný atvinnutækifæri og bætt lífskjör fólks á landsbyggðinni. Þetta er fólkið sem tók frumkvæði og lagði eignir fjölskyldunnar undir til að búa til eitthvað nýtt og skapa verðmæti fyrir sig, nágranna sína og samfélagið. Það liggja gífurleg verðmæti fyrir okkur öll í því að þau nái að lifa veturinn og rísa upp á ný á næsta ári.“