Jóhanna Vigdís Guðmundsdóttir, framkvæmdastjóri og fyrrverandi varaþingmaður Samfylkingarinnar, segist enn vera að jafna sig eftir að hafa heyrt samtal miðaldra hjóna í Bónus á dögunum.
Jóhanna segir frá þessu í bakþönkum Fréttablaðsins í dag, en eins og kunnugt er hefur talsvert verið fjallað um hættuna af gróðureldum í þeirri þurrkatíð sem hefur verið á suðvesturhorni landsins undanfarnar vikur. Nú þegar hafa nokkrir eldar kviknað og er skemmst að minnast brunans í Heiðmörk á dögunum sem nokkuð erfiðlega gekk að ráða við.
Jóhanna er eigandi sumarhúss í Skorradal en þar hafa sumarhúsaeigendur margoft viðrað áhyggjur sínar af mögulegum gróðureldum.
Í pistlinum segir Jóhanna frá því að hún hafi eytt nokkrum dögum í að raka sinu, saga niður tré í kringum sumarhúsið og þá hafi hún gengið svo langt að safna saman þurru laufi.
„Það er ekki mjög íslenskt, enda erum við svo óvön trjám að það má helst ekki skerða greinar þeirra, hvað þá saga þau niður. Ég fór sem sagt um hlíðina með sög í vinstri og hrífu í hægri, eins og kona gerir á uppstigningardag. Sumir myndu segja eins og eldur í sinu,“ segir Jóhanna sem hvetur fólk til að taka enga óþarfa áhættu.
„Ég er því enn að jafna mig eftir að hafa, óvart vel að merkja, heyrt á tal miðaldra hjóna í Bónus í hinum eðla bæ Borgarnesi. Þau töluðu í hálfum hljóðum (svona heyri ég óskaplega vel) um hvað þau ættu að grilla í bústaðnum, kalda piparsósu með grillsteikinni, og mikilvægi þess að muna eftir að kaupa kol og grillvökva. Nú gæti forsjárhyggjufólk haldið því fram að skynsamlegast væri að læsa kol og grillvökva inni á meðan við bíðum eftir hinu eðlilega íslenska rigningarsumri. Hinn möguleikinn er auðvitað að læsa þessi hjón inni þar til byrjar að rigna,“ segir Jóhanna Vigdís sem bætir við að íslenska rigningarsumarið muni koma.
„Þangað til skulum við ekki vera grillandi kjánaprik, umkringd þurri sinu og brakandi ársgamalli lúpínu. Það er líka miklu meiri stemning að grilla í grenjandi rigningu.“