Suzuki Ryotaro, nýr sendiherra Japans á Íslandi, hefur vakið lukku fyrir skemmtilegar Twitter-færslur undanfarið og þykir gamansamur maður. Hann ætlaði að gera sér glaðan dag í Laugardalnum í gær og skella sér á skauta.
Þá blasti við honum miði í hurð Skautahallarinnar sem á stóð að sumarlokun væri í gildi frá 18. maí til 4. september. „Vonsvikinn að komast að því að skautasvellið sé lokað,“ skrifar hann á Twitter.
Disappointed to find the link is closed.. pic.twitter.com/VFnJpyjJ3T
— SUZUKI Ryotaro 鈴木亮太郎 (@SUZUKIRyotaro1) July 17, 2021
Viðtal við Suzuki birtist í helgarblaði Fréttablaðsins. Hann kom til landsins fyrir um mánuði síðan og segist kunna afskaplega vel við sig hér en hann hóf íslenskunám fyrir komuna hingað.
„Ég er búinn að vera í utanríkisþjónustunni nokkuð lengi. Næstum 40 ár,“ segir Suzuki og bætir við að staða hans á Íslandi sé sú áttunda sem hann tekur erlendis. „Ég hef meðal annars verið í löndum eins og Svíþjóð og Kanada þannig að veðrið hérna og loftslagið truflar mig ekki neitt. Þótt það sé mjög ólíkt Japan þar sem eru regntímabil og frekar heitt og rakt,“ segir sendiherrann meðal annars í viðtalinu.
Athygli vakti fyrir skömmu þegar Suzuki hitti Bjarna Benediktsson fjármálaráðherra og tísti mynd af þeim félögum og sagði Bjarna vera hávaxinn og myndarlegan.