Stjörnublaðamaður Vísis, Jakob Bjarnar, lætur Ríkisútvarpið heyra það í pistil á Facebook þar sem hann veltir því upp hvort það sé eðlilegt að dagskrárgerðarmenn starfi samhliða sem tónlistarmenn á kvöldin.
„Fæstum þætti eðlilegt ef ég starfrækti veitingastað á kvöldin en fjallaði sem blaðamaður um veitingageirann vítt og breytt á daginn. Og gæfi mig út fyrir að vera faglegur í því. En þetta er nákvæmlega sambærilegt við það sem er að gerast hjá Ríkisútvarpinu og hefur tíðkast lengi. Þar eru ýmsir dagskrárgerðarmenn sem samhliða starfa sem tónlistarmenn á kvöldin. Þarna eru auðvitað samansúrruð hagsmunatengsl,“ skrifar Jakob.
„Ef á að vera hægt að verja þennan ríkisrekstur á samkeppnisvettvangi þá verður stofnunin að vera fagleg. En það er hún auðvitað ekki og skákar í því skálkaskjólinu að Íslendingar eru prinsipplaus þjóð. Auðvitað er þetta ekkert stórmál í hugum flestra en ef við föllumst á að þetta sé í góðu lagi hvernig á þá að vera hægt með góðu móti að gagnrýna spillingu þegar meiri sameiginlegir hagsmunir eru undir? Prinsipp eru ekki umsemjanlegt fyrirbæri, eða spurning um hvar á að setja línuna. (Ég geri ekki ráð fyrir að fá mörg læk á þennan status ef nokkurt — hún verður alltaf þykk þögnin þegar ég impra á þessu.),“ heldur Jakob áfram.
Fjölmargir sýna Jakobi stuðning í athugasemdum og hafa yfir hundrað manns líkað við færsluna þegar þetta er skrifað.
Ólafur Páll Gunnarsson, dagskrárgerðarmaður á RÚV, svarar hins vegar Jakobi í fullum hálsi í athugasemd og sakar gagnrýnendur Ríkisútvarpsins um að hlusta ekki á útvarpið,.
„Ég hef bara þetta að segja sem opinber starfsmaður Ríkisútvarpsins. Við sem þar störfum erum fyrst og fremst að vanda okkur við að gera gott útvarp fyrir sem flesta. Það er örugglega margt sem er hægt að gera betur en okkur tekst í dag en það er engin spilling - ekkert samsæri - enginn klíkuskapur og ekkert slíkt. Við erum opinberir starfsmenn og högum okkur samkvæmt því. Það vilja allir meiri spilun en þeir fá - það er staðreynd,“ skrifar Ólafur.
„Þið sem gagnrýnið mest - hafið þið kynnt ykkur dagskrána á Rás 2? Hlustið þið virkilega á Rás 2? Vitið þið um alla póstana sem við erum með til að kynna íslenska tónlist? Og hver raunverulegur munur er á Rás 2 og öðrum stöðvum varðandi íslenska tónlist td?
Við erum að gera mikið af góðum hlutum varðandi Íslenska tónlist - allskonar tónlist, en fyrst og fremst þurfum við að sinna eigendum útvarpsins - hlustendum,“ bætir hann við.
„Það getur ekki verið sjálfsagður réttur fólks sem fæst við það að búa til músík - að hún sé sjálfkrafa spiluð á Rás 2 - það virkar bara ekki þannig. Matur er mis-góður, og það er músík líka. Þetta er ekki allt jafn gott. Ég ber mikla virðingu fyrir tónlistarfólki yfir höfuð og elska tónlist. Ást og friður í massavís,“ skrifar Ólafur að lokum.