Blaðamaðurinn Jakob Bjarnar Grétarsson hefur bæst í hóp þeirra fjölmörgu sem gagnrýna hörð viðbrögð formanns Dómarafélags Íslands við mistökum Fjársýslu ríkisins við ofgreiðslu launa til ýmissa ráðamanna.
Í stöðuuppfærslu á Facebook segir Jakob Bjarnar. „Ef hin (reyndar mikilvæga) virðing fyrir dómstólum landsins væri ekki þegar niðri í kjallara, m.a. vegna ýmissa bjánalegra dóma sem þar hafa verið kveðnir upp þá væri þetta gíruga og smásálarlega upphlaup dómarafélagsins verulegt áhyggjuefni.“
Þá deilir hann grein Evu Hauksdóttur, lögmanns, sem birtist á Vísi fyrr í dag og ber yfirskriftina „Þarf að tryggja hlutleysi dómara með ofgreiddum launum?“
Þar gerir Eva yfirlýsingu Dómarafélags Íslands að umræðuefni og segist hafa áhyggjur af „móðursýkislegum viðbrögðum Dómarafélagsins við fréttum af því að félagsmenn þess þurfi kannski að endurgreiða ríkinu sem svarar tíu daga launum en því að framkvæmdarvaldið refsi dómurum með launalækkun.“
Eva segir þá afstöðu stjórnar Dómarafélags Íslands, að ákvörðun fjármálaráðherra vegi að rétti borgaranna til réttlátrar málsmeðferðar fyrir dómi, stærra áhyggjuefni. „Hvað merkir þetta eiginlega? Á stjórn Dómarafélagsins við að þegar dómarar njóti ekki lengur góðs af mistökum ríkisins aukist hættan á því að þeir dæmi eftir einhverju öðru en lögunum?“ segir Eva