Jakob Bjarnar Gretarsson blaðamaður veltir því fyrir sér hvers vegna ekki sé hægt að losna við ríkisstarfsmenn úr starfi án þess að það þurfi að kosta almenning „handlegg í skaðabætur.“ Tilefnið er mál Björns Þorlákssonar, fyrrverandi upplýsingafulltrúa Umhverfisstofnunar.
Eins og fram hefur komið var mál Björns tekið fyrir í héraðsdómi Reykjavíkur í gær. Björn hefur höfðað bótamál á hendur íslenska ríkinu á grundvelli þess að staða hans hjá Umhverfisstofnun hafi verið lögð niður með ólögmætum hætti. Hann fer fram á tveggja ára laun og miskabætur, en krafan nemur samtals 23 milljónum króna.
Jakob furðar sig á málinu almennt. „Jahérna hér. Burtséð frá Birni og þessu máli sem ég þekki ekki í smáatriðum, heldur almennt: Er það svo að ekki er nokkur einasta leið að losna við ríkisstarfsmenn af fóðrunum án þess að það kosti okkur almenning handlegg í skaðabætur? Við erum að sligast,“ skrifar Jakob.
Ýmsir leggja orð í bel, meðal annars Sósíalistaforinginn Gunnar Smári. „Íslendingar eru nú orðnir 370 þúsund svo þessar 23 m.kr. eru ekki nema rétt rúmar 62 kr. á mann. Handleggurinn á þér er meira virði, hann er bæði atvinnutæki þegar þú skrifar og leikfangið þitt í golfi.“
Karl Th kemur ríkisstarfsmönnum til varnar. „Ríkisstarfsmenn á fóðrunum? Áttu við lækna, hjúkrunarfræðinga, löggur, kennara eða jafnvel bara starfsmenn Skattsins? Hvers konar þráhyggja er þetta?“
Jakob svarar: „Nei, ég á ekki við það. Það liggur fyrir samfélagsleg sátt um að ríkið haldi úti samfélagsþjónustu sem snýr að löggum, hjúkkum og kennurum. Alltaf þegar ég bendi á þetta úttútnaða bákn, sem við hin fáu launaþrælar sem borgum svimandi skatta á Íslandi eru með á herðunum, og læt ekki fylgja með þennan diskleimer poppa upp einhverjir amlóðar með þessa hártogun: Áttu kannski við lækna, hjúkrunarfræðinga og kennara?
Nei, þetta eins og annað er með normal fyrirvörum, en ekki hvað? Það hefur hins vegar og til dæmis aldrei verið rætt sérstaklega að hér sé til að mynda haldið úti stóði upplýsingafulltrúa á öllum hugsanlegum og óhugsanlegum póstum. Mér þykir ekki ólíklegt að hvergi á byggðu bóli séu jafn margir upplýsingafulltrúar per haus á fóðrum hins opinbera. Af hverju vilt þú verja það með því að tala um eitthvað allt annað, Kalli?“