Íslendingurinn sem vann 75,5 milljónir króna í EuroJackpot er eldri kona sem hafði keypt sér svokallaðan margviknamiða sem innihélt þrjár raðir.
Konan hefur nú heimsótt Íslenska getspá í Laugardalnum með vinningsmiðann góða meðferðis, en hann var keyptur í Vídeómarkaðnum í Hamraborg í Kópavogi.
Í tilkynningu frá Íslenskri getspá kemur fram að konan hafi látið renna miðanum í gegnum sölukassa til að athuga hvort á honum væri vinningur. „Kassinn gaf frá sér vinningshljóð og kvittun með vinningsupphæðinni, í fyrstu hélt hún að vinningurinn væri upp á 75 þúsund krónur en þegar afgreiðslumaðurinn sagði henni að líta aftur og enn betur á miðann, varð henni þá ljóst að vinningurinn væri upp á rúmar 75,5 milljónir.“
Í tilkynningunni segir að konan hafi hreinlega misst andann og andlitið af gleði og varla komið upp orði fyrr en heim var komið.
„Konan, sem er á leiðinni á eftirlaun segir að þessi gleðilegi vinningur eigi heldur betur eftir að koma sér vel, bæði fyrir hana og börnin hennar og hlakki hún nú til að setjast í helgan stein og vera laus við peningaáhyggjur,“ segir í tilkynningunni.
Starfsfólk Getspár/Getrauna óskar vinningshafanum innilega til hamingju og þakkar um leið veittan stuðning sem skiptir gríðarlega miklu máli fyrir öryrkja, íþrótta- og ungmennafélögin í landinu þar sem þau njóta góðs af sölu Lottó, Vikinglotto og EuroJackpot.