Danir hafa ákveðið að opna landamæri sín fyrir Íslendingum þann 15. júní næstkomandi, eða á sama tíma og Ísland opnar sín landamæri. Þetta sagði Guðlaugur Þór Þórðarson utanríkisráðherra í hádegisfréttum Bylgjunnar í dag.
Auk Dana hafa Færeyingar og Eistar ákveðið að bjóða Íslendinga velkomna. Færeyingar frá og með 15. júní og Eistar frá og með 1. júní.
Guðlaugur sagði að utanríkisráðherra Dana hefði tilkynnt honum í gær að landamærin yrðu opnuð fyrir Íslendingum um miðjan júnímánuð.
Í frétt Vísis um málið kemur fram að Norðmenn séu enn í viðræðum við íslensk yfirvöld um ferðir milli landanna í sumar. Norðmenn hafa þegar náð samkomulagi við Dana um ferðalög milli landanna og er vonast til þess að hægt verði að ná samskonar samkomulagi við önnur ríki, Ísland þar á meðal.