Íslandsbanki borgar langhæstu stjórnarlaun af þeim fyrirtækjum sem eru í ríkiseigu. Þetta kemur fram í Fréttablaðinu í dag en þar segir að stjórnarmenn í bankanum fái 630 þúsund krónur á mánuði.
Til samanburðar greiðir Landsbankinn stjórnarmönnum 420 þúsund krónur og þá fær stjórnarformaður Íslandsbanka 945 þúsund krónur. Landsbankinn greiðir stjórnarformanni 735 þúsund.
Í Fréttablaðinu er bent á að stjórnarseta í Bjargráðasjóði færi stjórnarmönnum níu þúsund krónur.
Ríkið gerði rekstur fyrirtækja sinna gegnsærri og aðgengilegri með myndrænni birtingu á vef Stjórnarráðsins í gær. Samkvæmt tölum fyrir árið 2020 eru 55 prósent stjórnarmanna fyrirtækjanna karlar en konur eru 45 prósent. Íslenska ríkið á alfarið eða ráðandi hluti í 37 fyrirtækjum.