„Finnst ykkur ekki svolítið merkilegt að í 90 prósentum íslenskra skandala í pólitík — mála sem leiða í ljós spillingu, klúður, vanhæfni, hroka, yfirgang, yfirlæti, fúst og yfirdrepsskap — þá reynist sökudólgurinn hafa verið Sjálfstæðismaður?“
Þessari spurningu varpar Illugi Jökulsson, rithöfundur og samfélagsrýnir, fram á Facebook-síðu sinni.
Illugi deilir þar frétt RÚV frá því í dag þar sem fram kom að Áslaug Arna Sigurbjörnsdóttir dómsmálaráðherra hafi ekki skráð samskipti sín við Höllu Bergþóru Björnsdóttur, lögreglustjóra á höfuðborgarsvæðinu, á aðfangadag.
Eins og greint var frá á dögunum hringdi Áslaug Arna í Höllu í tvígang eftir að greint var frá því í dagbók lögreglu að ráðherra í ríkisstjórn Íslands hefði verið viðstaddur gleðskap þar sem grunur var um sóttvarnabrot. Umræddur ráðherra var Bjarni Benediktsson, fjármálaráðherra og formaður Sjálfstæðisflokksins.
Í frétt RÚV kemur fram að lögum samkvæmt þurfi að færa skrá um formleg samskipti og fundi ef þau teljast mikilvæg. Málið hefur valdið nokkrum titringi og hefur verið látið að því liggja að Áslaug Arna hafi haft óeðlileg afskipti af máli sem væri í rannsókn hjá lögreglu.
Illugi segir að það sé löngu orðið „sjálfstætt þjóðþrifamál“ að losna við Sjálfstæðisflokkinn. „Kaupum okkur frið frá spillingu íhaldsins og hroka ríku kallanna og þjóna þeirra með atkvæði okkar í næstu kosningum.“