Frumvarp Pírata um afnám refsinga fyrir vörslur neysluskammta fíkniefna var fellt á Alþingi í nótt. Mjög skiptar skoðanir voru um frumvarpið en í samtali við Fréttablaðið um helgina sagði Sara Elísa Þórðardóttir, varaþingmaður Pírata, að málið snerist ekki um vímuefni í sjálfu sér heldur heilbrigðisvandamálið sem fíkn er.
Í greinargerð með frumvarpinu kom fram að tryggt yrði að áfram verði hægt að beita refsingum þegar augljóst er að efnin séu ekki ætluð til einkanota. Innflutningur, útflutningur, sala, skipti, afhending, framleiðsla og tilbúningur efna verður áfram refsiverður. „Þannig er öruggt að áfram verður hægt að sakfella fyrir það sem kann að teljast alvarlegri brot á lögum um ávana- og fíkniefni, en refsingum ekki beitt gegn neytendum fíkniefna.“
Frumvarpið var fellt á Alþingi í nótt og hefur það vakið nokkuð hörð viðbrögð á samfélagsmiðlum.
„Þetta var fellt. Hér gafst einstakt tækifæri til að hætta að refsa fólki fyrir það helvíti að vera í fíknivanda - og þrátt fyrir augljósa þverpólitíska sátt - var tækifærinu kastað á glæ. Ömurlegt,“ segir Sara Elísa í Pírataspjallinu á Facebook.
Illugi Jökulsson, rithöfundur og samfélagsrýnir, segir að Íslandsmetið í pólitískri hræsni, yfirdrepsskap og kaldrifjuðum valdhroka hafi verið slegið á Alþingi í nótt.
„Það gerðu þingmenn ríkisstórnarflokkanna í stjórn Katrínar Jakobsdóttur með því að hafna frumvarpi Pírata um afnám refsinga vegna neysluskammta fíkniefna. Skammarlegt framferði. Ég skal viðurkenna að ég er meira hissa á sumum en öðrum fyrir þetta afglapaverk,“ segir Illugi sem birti síðan nöfn þeirra þingmanna stjórnarflokkanna sem sögðu nei eða sátu hjá. Hvetur Illugi til að fólk leggi nöfn þeirra á minnið.
Kristinn Hrafnsson, ritstjóri Wikileaks, gerði slíkt hið sama eftir atkvæðagreiðsluna í nótt.
„Undir klukkan tvö í nótt felldi gallharðasti og gallsúrasti íhaldsarmur Alþingis, stjórnarþingmenn, dyggilega studdir af þingflokki Miðflokksins, frumvarp um að hætta að refsa fíklum fyrir neysluskammta. Þarna felldu stjórnarþingmenn úrbætur sem er njörvaður í þeirra eigin stjórnarsáttmála en þeir hafa ekki komið í verk á þremur fyrstu árum þessa kjörtímabils. Þeir höfðu uppi aumar mótbárur um að frumvarpið væri gallað en gátu ekki bent á eitt einasta atriði sem ekki var hægt að hrekja með afgerandi hætti, að mestu með því að vísa í frumvarpið sjálft ásamt breytingartillögum,“ segir Kristinn og birtir nöfn þeirra þingmanna úr VG, Sjálfstæðisflokki, Framsóknarflokki og Miðflokki sem sögðu nei við frumvarpinu.
Íslandsmetið í pólitískri hræsni, yfirdrepsskap og kaldrifjuðum valdhroka var slegið í nótt. Það gerðu þingmenn...
Posted by Illugi Jökulsson on Þriðjudagur, 30. júní 2020
Undir klukkan tvö í nótt felldi gallharðasti og gallsúrasti íhaldsarmur Alþingis, stjórnarþingmenn, dyggilega studdir af...
Posted by Kristinn Hrafnsson on Mánudagur, 29. júní 2020