„Við hjónin fengum boð í sveitabrúðkaup í sumar og með því tilboð í hótelgistingu eina nótt með morgunverði fyrir tvo á 13.900 kr.- Við ætlum að nota ferðagjöf beggja og fáum þar með hótelgistinguna og morgunverðinn á 3900 kr.“
Þetta segir Guðfinnur Sigurvinsson, fjölmiðlamaður og varabæjarfulltrúi Sjálfstæðisflokksins í Garðabæ, í pistli sem birtist á vef Vísis.
Þar skrifar Guðfinnur um 5.000 króna ferðagjöf stjórnvalda til almennings á Íslandi. Guðfinnur hvetur sem flesta til að nota gjafabréfið, jafnvel þó einhverjum kunni að þykja upphæðin of lítil.
„Hugsum okkur ef Kringlan byði öllum viðskiptavinum verslunarmiðstöðvarinnar upp á 5000 kr.- gjafabréf sem fólk gæti nýtt á tilteknu tímabili. Mismunandi verslanir Kringlunnar væru samtímis með alls kyns tilboð sem hægt væri að nýta með gjafakortinu og ávinningur neytenda þannig aukinn. Hvort væri óhætt að ganga út frá því í framhaldinu að bílastæði Kringlunnar yrðu smekkfull eða galtóm?“
Guðfinnur segir að það sé viss mælikvarði á hagsæld ef til er fólk sem finnst ekki taka því að innleysa umræddar fimm þúsund krónur. Þá væri enn betra ef þeir hinir sömu gætu framvísað gjafabréfi sínu til þeirra sem vilja nota það. „Ef hver og einn gæti þannig að hámarki framvísað 15 slíkum gjafabréfum í verslunum Kringlunnar, samtals að andvirði 75.000 krónur, þá væri verslunarferðin aldeilis til fjár.“
Guðfinnur segir að ferðagjöfin sé til þess fallin að efla mörg og mismunandi fyrirtæki sem þrífast undir hatti ferðaþjónustunnar. „Tilgangurinn er að beina viðskiptum landans að fyrirtækjum í ferðaþjónustu sem blæðir um þessar mundir en ekki til að ríkisstyrkja ferðalög almennings upp í topp.“
Guðfinnur segir að dæmið sem hann nefnir sýni að kaupgeta þeirra hjóna aukist vegna ferðagjafarinnar og því myndast ríkari hvati til að nota aðra ferðaþjónustu, til dæmis baðlón á svæðinu.
„Það þarf ekki að fara langt til að gjöfin komi að gagni. Hægt er að efla ferðaþjónustu í næsta nágrenni eða heimabyggð en ferðagjöfina má almennt nýta í samgöngur, gistingu, veitingar og afþreyingu um allt land. Komum andvirði ferðagjafarinnar í vinnu og verjum íslenska ferðaþjónustu. Í krafti fjöldans getum við stækkað ferðagjöfina og myndað iðandi ferðakeðju upp Ártúnsbrekku, hringinn í kringum landið og aftur heim.