Hilma Hólm, hjartalæknir hjá Íslenskri erfðagreiningu, segir að það eigi að koma í veg fyrir að fólk sýkist af kórónuveirunni. Þetta kom fram í viðtali við Hilmu í Kastljósi í kvöld.
„Fólk getur farið illa út úr því að veikjast af þessari veiru,“ segir Hilma. Hún bendir á að það séu ekki einungis þeir sem veiktust illa sem glími við erifð eftirköst. Það eigi einnig við um dágóðan hluta þeirra sem veiktust ekki mikið.
Hilma segir að rannsókn Íslenskrar erfðagreiningar á langtímaafleiðingum hafi meðal annars leitt í ljós að skert lyktar-og bragðskyn virðist ekki tengjast alvarleika veikindanna og að stór hópur glímir enn við mikil einkenni, sumir jafnvel 5 til 11 mánuðum eftir að þeir veiktust.
„Ég myndi halda að það væri skynsamlegt að herða aðgerðir á landamærunum eins og sóttvarnalæknir hefur rætt,“ segir hún.