„Undirritaðri kom það í opna skjöldu við lestur fundargerðar bæjarráðs að tölvupóstur sem ég sendi persónulega á bæjarstjóra í byrjun nóvember var gerður að opinberu fylgiskjali á vefsíðu sveitarfélagsins að mér forspurðri,“ segir Hildur Sólveig Sigurðardóttir, bæjarfulltrúi og oddviti Sjálfstæðisflokksins í Vestmannaeyjum, í pistli á vef Eyjafrétta.
í pistlinum sakar hún bæjarráð um trúnaðarbrest með því að birta tölvupóst sem hún sendi Írisi Róbertsdóttur, bæjarstjóra Vestmannaeyja, að henni forðspurðri.
Engin hernaðarleyndarmál
Hildur segir að í tölvupóstinum hafi ekki verið að finna nein hernaðarleyndarmálið, heldur einfaldlega beiðni eftir upplýsingum um kostnað vegna stöðugilda, forsendum ákvörðunartöku vegna ráðningamála og upplýsingum um upphæðir vegna hagræðinga. Hildur segir að fróðlegt hefði verið að fá svör við þessu en svo virðist sem bæjarráð telji að þær upplýsingar eigi ekki erindi við almenning.
„Þessi vinnubrögð bæjarráðs koma í kjölfarið á því að undirrituð bókaði afgerandi á síðasta bæjarstjórnarfundi um hversu mikið hefur hægt á upplýsingaflæði til kjörinna fulltrúa eftir að þeim var gert að beina öllum fyrirspurnum sínum til bæjarstjóra, pólitískt kjörins embættismanns, en ekki til annarra óháðra starfsmanna sveitarfélagsins. Slíkt lengir boðleiðir enda bæjarstjóri væntanlega einn uppteknasti starfsmaður sveitarfélagsins,“ segir Hildur í grein sinni.
Minna traust
Hún segir að þau vinnubrögð sem bæjarráð sýndi af sér með birtingu þessa tölvupóstar í leyfisleysi séu til þess fallin að valda verulega skertu trausti á samskiptum og trúnaði kjörinna fulltrúa við æðsta embættismann sveitarfélagsins.
„Samskiptum og trúnaði sem hafa haldið vel hingað til í málum sem snúa að miklum hagsmunum samfélagsins og hafa einkennt umræður og ákvarðanatöku vegna t.d. samgöngumála og heilbrigðismála. Héðan í frá mun undirrituð þó þurfa að muna að öll mín framtíðarsamskipti við bæjarstjóra í gegnum tölvupóst munu hugsanlega verða birt opinberlega án þess að ég hafi svo mikið sem andmælarétt.“
Hildur segir enn fremur að ekki áður á kjörtímabilinu hafi fyrirspurnir annarra kjörinna fulltrúa verið opinberaðar með sama hætti.
„Núverandi meirihluti bæjarstjórnar boðaði í aðdraganda kosninga aukið gegnsæi en það gegnsæi virðist vera valkvætt. Það er í lagi að birta fyrirspurnir ákveðinna bæjarfulltrúa en ekki allra. Það eru bara birtar fyrirspurnir en ekki svör. Í öðrum lið á sama fundi bæjarráðs var tekið fyrir erindi frá PWC þar sem óskað var eftir því að bréf frá þeim yrði tekið til efnislegrar umræðu og að því yrði svarað, samt er hvorki það bréf né svar gert opinbert þó óskað hafi verið sérstaklega eftir að efni þess væri rætt í bæjarráði. Af hverju skyldi það vera?“
Pistil Hildar má lesa í heild sinni hér.