Hertum aðgerðum, sem hafa verið í gildi á norðanverðum Vestfjörðum var aflétt í dag en ekkert smit hefur greinst á Vestfjörðum frá 27. apríl síðastliðnum og ákvað því aðgerðarstjórn almannavarna á Vestfjörðum, í samráði við sóttvarnalækni, að aflétta aðgerðunum.
„Nú eru allir Vestfirðir komnir á sama stað og landið allt, hvað varðar takmarkanir til að hefta útbreiðslu covidsmits,“ segir í færslu lögreglunnar á Vestfjörðum á Facebook.
Hertar aðgerðir, þar sem samkomubann miðast meðal annars við fimm manns, hafa verið í gildi frá 1. apríl síðastliðnum á Ísafirði, Hnífsdal og Bolungarvík.
„Við viljum þó minna á að allir þurfa að halda áfram að vera á varðbergi þannig að ekkert bakslag verði í þessari góðu þróun hjá okkur,“ segir enn fremur í færslunni og er þar vitnað í hinn svokallaða samfélagssáttmála.
Tilslakanir á samkomubanni hér á landi hófust 4. maí síðasliðinn og er stefnt á að fara hraðar í afléttingar þar sem faraldurinn er á niðurleið en engin ný smit hafa greinst síðustu fjóra daga og eru virk smit á landinu aðeins 18 talsins.
Í færslu sem lögreglan birti síðastliðinn föstudag kemur fram að þrátt fyrir að faraldurinn hafi komið harkalega niður á Vestfirðingum hafi einstaklingar, fyrirtæki og stofnanir staðið sig vel í ljósi stöðunnar. „Svo virðist sem þetta hafi allt tekist með útsjónarsemi og samstilltu átaki. Fyrir þetta ber að þakka.“