„Jæja. Hvenær ætlum við að hætta að láta vaða yfir okkur?“ spyr rapparinn Árni Páll Árnason, betur þekktur sem Herra Hnetusmjör á Instagram síðu sinni. Ljóst er að kappinn er kominn með nóg vegna þess sem hann kallar aðgerðaleysi ríkisstjórnarinnar á landamærunum.
Þar birtir rapparinn meðal annars skjáskot af frétt RÚV þar sem kemur fram að byrjað sé að hleypa farþegum utan Schengen svæðisins inn í landið. Á eftir þeirri mynd birtir hann yfirlit af þeim takmörkunum sem Íslendingar lifa nú við.
Líkt og er alkunna mega nú aðeins tíu koma saman. Þá eru barir og skemmtistaðir lokaðir auk líkamsræktarstöðva og sundstaða. Núverandi takmarkanir eru í gildi til 15. apríl en ekkert hefur verið gefið upp um það hvort að til afléttinga komi við það tilefni.
„Við þurfum að sýna ríkisstjórninni að við erum komin með nóg. Nóg af því að vera sett í annað sæti. Nóg af því að mega ekki hitta ástvini. Nóg af því að mega ekki stunda nám eða vinnu. Allt á meðan landamærin eru opnuð enn meir,“ skrifar rapparinn.
Hann segist ekki hafa við neinu að bæta við mál sitt við Vísi. Þá óskar hann eftir tillögum frá fylgjendum sínum á Instagram að því hvað hann eigi að gera og spyr:„Mótmæli? Hætta að hlýða? Brenna allt? Opinn fyrir öllu.“
