Tónlistarmaðurinn sívinsæli Herra Hnetusmjör greinir frá því að hann stefni á að taka upp nýtt tónlistamyndband á næstunni en hann var í dag valinn Bæjarlistamaður Kópavogs á 65 ára afmæli Kópavogsbæjar.
„Það er alveg geggjað að fá þessa viðurkenningu frá Kópavogsbæ eftir að hafa lagt alla þessa vinnu inn, þetta er þvílíkur heiður og ég er gríðarlega þakklátur,“ segir Herra Hnetusmjör um valið en tilkynnt var um valið í gamla skólanum hans, Vatnsendaskóla.
Herra Hnetusmjör hefur vakið mikla athygli frá því að hann steig fram sem tónlistarmaður árið 2014 og í textum hans má oft finna skírskotun til Kópavogsbæjar þar sem hann býr. „Ég þakka kærlega fyrir stuðninginn frá Kópavogsbúum gegnum árin og þakka Kópavogsbæ fyrir viðurkenninguna.“
„Ég ætla að skjóta tónlistarmyndband um allan Kópavog á stöðum sem hafa mótað mig. Mig langar líka að koma sem flestum Kópavogsbúum í myndbandið en ég mun fara nánar út í þetta verkefni þegar þar að kemur.“
Hann gaf ekki frekari upplýsingar um hvaða lag tónlistarmyndbandið yrði við en hann vinnur nú að nýrri plötu sem búist er við að líti dagsins ljós fyrir lok árs.
