Yfirlæknar rannsóknardeilda Landspítalans, þeir Björn Rúnar Lúðvíksson, Ísleif Ólafsson, Jón Jóhannes Jónsson, Pál Torfa Önundarson og Svein Guðmundsson, segja stóran galla leynast í byggingu nýja Landspítalans sem rís nú við Hringbraut. Í grein sem þeir skrifa í Morgunblaðið í dag segja þeir að allt samráð við yfir- og sérfræðilækna við byggingu nýja þjóðarsjúkrahússins vera sýndarsamráð, láta þeir í veðri vaka að þeir stjórnendur sem haft sé samráð við séu einhverjir sviðsstjórar eða forstöðumenn sem hafi enga heimild til að sinna lækningum.
„Á fundi allra fagstjórnenda rannsóknadeilda og röntgendeilda Landspítala 22. september sl. var gerð könnun á afstöðu þeirra til fyrirhugaðra opinna skrifstofurýma. Töldu sex af sex yfirlæknum og níu af níu lífeindafræðingum og líffræðingum að opin skrifstofurými myndu torvelda þeim að rækja störf sín vel. Allir mæltu á móti opnum vinnurýmum stjórnenda og sérfræðinga sem fara með viðkvæm mál og þurfa næði,“ segja þeir.
„Ljóst er að einhverjir pótintátar hafa verið teknir fram yfir yfirlækna og deildarstjóra í þann hóp 200 starfsmanna sem hannar bygginguna og „eru allir sammála“. Þrátt fyrir eftirgrennslan hefur ekki tekist að fá lista yfir þessa 200 starfsmenn.“
Kalla þeir eftir málefnalegum svörum frá forstjóra um hverjir þetta séu sem verið er að hlusta á. „Lög heimila forstjóra ekki að bera faglega ábyrgð á lækningum. Hans hlutverk er annað. Því síður mega aðilar sem sitja í framkvæmdastjórn á grunni framselds valds forstjóra bera faglega ábyrgð.“
Vitna þeir svo í ályktun læknaráðs um að lakari vinnuaðstaða muni aðeins gera mönnunarvandann enn verri. „Víða erlendis er verið að leggja af opin skrifstofurými vegna slæmrar reynslu,“ segja þeir.
„Hönnunargallar nýja rannsóknarhússins eru ein birtingarmynd þess að fagþekking og reynsla sé sett til hliðar á spítalanum. Er ekki eitthvað öfugsnúið við að tala um notendasamráð þegar sjónarmið faglegra stjórnenda og læknaráðs Landspítala eru sniðgengin? Að „notendastudda hönnunin“ sé sýndarsamráð; sjónhverfing.“
Þeir segja þetta grafalvarlegt mál:
„Að hlusta ekki á ráð yfirlækna og læknaráð á lækningastofnun er óneitanlega alvarlegt og skondið í senn. En staðreyndin er sú að sjónarmið yfirlækna og sérfræðilækna hafa verið sniðgengin um árabil. Það getur haft afdrifaríkar afleiðingar hvað varðar notagildi, mönnun og öryggi þessarar stærstu nýbyggingar Íslandssögunnar.“