Helgi Hrafn Gunnarsson og Smári McCarthy, þingmenn Pírata, hyggjast ekki gefa kost á sér í næstu alþingiskosningum. Þetta kemur fram í tilkynningu frá þingflokki Pírata nú í morgunsárið.
Þar kemur jafnframt fram að þó að komandi vetur verði þeirra síðasti á þingi muni þeir áfram starfa innan Pírata.
Helgi Hrafn og Smári ræða ákvörðun sína í helgarblaði Fréttablaðsins. Þar segja þeir ákvarðanir þeirra teknar meðal annars vegna þess að hvorugum hugnist að ílengjast um of á þingi, en jafnframt að umbótamálum þurfi ekki síður að sinna utan veggja Alþingis.
Þeir segjast hafa ákveðið að greina frá þessari ákvörðun sinni í dag, ári fyrir fyrirhugaðar þingkosningar, í aðdraganda aðalfundar Pírata sem fram fer um helgina. Með því að greina frá ákvörðun sinni tímanlega gefist fólki sem hefur áhuga á að bjóða Pírötum krafta sína í næstu kosningum góður umhugsunarfrestur og undirbúningstími. Helgi Hrafn og Smári segjast einnig geta betur verið því fólki innan handar séu þeir ekki sjálfir í framboði, enda stórt skref að helga sig stjórnmálum og að mörgu að huga.
Aðspurðir hvernig þingveturinn leggist í þá segjast þeir hafa nóg fyrir stafni og vera spenntir að hefjast handa. Vitandi að þetta verði þeirra síðasta ár á þingi gefi þeim aukinn þrótt til að vinna áfram að hinum ýmsum málum og málefnum Pírata á 151. löggjafarþingi, en þingsetning fer fram á fimmtudag.
Helgi og Smári segjast ekki hafa ákveðið hvað taki við að þingmennsku lokinni en ótal margt komi til greina. Þeir hafi báðir breitt áhugasvið og efast því ekki um að þeir finni sér áhugaverð viðfangsefni. Þeir eigi þó óneitanlega eftir að sakna þingflokksins.
Hér má nálgast viðtalið við Smára og Helga í Fréttablaðinu
