Helga Birna Jónasdóttir átti ekki orð til að lýsa ánægju sinni með starfsmann Bónuss í Spönginni í Grafarvogi í gær.
Helga sagði frá þessu í íbúahópi Grafarvogsbúa á Facebook og veitti hún Hringbraut leyfi til að birta færsluna – enda ekki vanþörf á jákvæðum fréttum um þessar mundir.
„Mig langaði að hrósa unga drengnum á kassanum í Bónus,“ segir Helga í byrjun færslunnar og segir svo frá því að hún hafi verið að kaupa sér kók og gripið Daim með í leiðinni. Þegar hún kom á kassann kom í ljós að hana vantaði 30 krónur upp á.
„Þannig að ég sagði bara: „Æ, sleppi þessu bara“. Ég tek kókið enda Daim-ið ekki nauðsynjavara og hefði alveg komist af án þess,“ segir Helga.
Pilturinn ungi á kassanum tók það ekki í mál og tók upp símann sinn, setti hann við posann og borgaði þessar 30 krónur sem upp á vantaði.
„Mér fannst hann svo mikill gullmoli, þó svo að þetta hafi verið lítill peningur þá var þetta eitt það krúttlegasta og yndislegasta sem ég hef orðið vitni að. Svona ungur og flottur strákur að gleðja, varð orðlaus,“ segir hún og færir starfsmanninum unga bestu þakkir. „Þessi ungi drengur á hrós skilið,“ segir hún.