„Hvað prófin varðar er sjálfsagt best að hið opinbera standi undir kostnaðinum af þeim, enda skilja ferðamenn margalda þá upphæð eftir sig,“ segir Heimir Hannesson, fjármálastjóri Tröllaferða.
Heimir skrifar um stöðu ferðaþjónustunnar í grein á Vísi og þar gerir hann meðal annars COVID-prófin sem til stendur að gera á ferðamönnum sem koma til landins frá og með 15. júní næstkomandi.
Ljóst er að slík próf eru ekki ókeypis og gæti kostnaðurinn við þau numið tugum, jafnvel hundruð, milljónum króna.
Heimir segir sjálfsagt að ríkið standi undir kostnaðinum og bendir hann á að ferðamenn skilji svo miklu meira eftir sig.
„Þess utan er Ísland nógu dýr áfangastaður án kórónuveiruprófs sem aðgöngumiða. Til gagns má geta að útgreiddar atvinnuleysisbætur námu 12 milljörðum um síðustu mánaðamót. Fyrir það hljóta að fást talsvert af strokum. Raunar hafa önnur lönd, t.d. Japan rætt um að ganga enn lengra og niðurgreiða allan ferðakostnað ferðamanna,“ segir hann.
Heimir bendir á að atvinnuleysi hafi farið hratt vaxandi að undanförnu, sérstaklega á þeim stöðum þar sem atvinnulíf hefur byggst upp á ferðaþjónustu. Nefnir hann Vík í Mýrdal sem dæmi.
„Ennfremur er staðan hjá íslenskum ferðaþjónustufyrirtækjum sú að um 90% af útgjöldum þeirra er launakostnaður. Það gefur því augaleið að atvinnuleysisskrá myndi þynnast ört með hverri fullri flugvél, enda rennur afgangurinn eftir skatta nánast óskiptur í vasa launþega sem margir hverjir þiggja sín laun í dag frá hinu opinbera. Fyrir að gera ekki neitt,“ segir hann.
Heimir segir einnig að ef planið er að prófa alla ferðamenn fyrir veirunni við komuna til landsins verði stjórnvöld að gefa það út.
„Þau verða að gefa út hver mun bera kostnaðinn af því og ef ferðamaðurinn, hvað mun það kosta hann? Þetta þarf að auðvitað að skýrast strax fyrir okkur hér heima og fyrir tilvonandi ferðamönnum.“