Heimir Karlsson, útvarpsmaður á Bylgjunni, skrifaði langa vangaveltu á Facebook í dag þar sem hann veltir fyrir sér hvers vegna hlutirnir eru ekki betri á Íslandi.
„Þetta er EKKI skrifað til höfuðs einum né neinum. Ekki til höfuðs einum né neinum stjórnmálaflokki eða valdamönnum undanfarin ár eða áratugi. Þetta eru aðeins vangaveltur um stöðuna hér og hvort við sem þjóð, höfum verið á leið í ranga átt lengi og hvort við séum enn á þeirri leið!“ skrifar Heimir.
Hann byrjar síðan á að segja örsögu.
„Fyrir um það bil 10 árum, sótti ég hinar fallegu Færeyjar heim. Þar átti ég spjall við fyrrum háttsettan embættismann. Talið barst að Íslandi. Hann velti fyrir sér hvers vegna gengi alltaf svona illa á Íslandi, þegar landið hefur upp á allar þessa auðlindir að bjóða. Hann taldi upp eftirfarandi:
• Fiskurinn í sjónum
• Landbúnaðurinn
• Jarðhitinn
• Drykkjarvatnið
• Árnar sem færa okkur rafmagnið
• Nefndi svo álframleiðsluna sem ætti að færa okkur sem þjóð miklar tekjur.“
„Svo bætti hann við að í Færeyjum væri ekkert af þessu nema fiskveiðarnar. Landbúnaðurinn væri lítill enda gæfi jarðvegurinn á eyjunum ekki kost á öðru.
Þá var laxeldi hvorki hafið á Íslandi né í Færeyjum og ferðaþjónustan ekki komin á skrið hér. Bankahrunið kom 2008, en staðan var lítið betri ef ekki verri fyrir hrunið!
Eftir þessa upptalningu spurði hann mig; með allar þessar auðlindir og ekki fjölmennari þjóð, hvers vegna gengur alltaf svona illa hjá ykkur?“ skrifar Heimir.
„Þessar vangaveltur hafa setið í mér síðan og nú, um 10 árum síðar, þegar ferðaþjónustan hefur fært okkur enn meiri tekjur, laxeldið, gagnaverin og fleira hafa bæst við, erum við enn á sama stað ef ekki verri.
• Heilbrigðiskerfið er undirfjármagnað og við heyrum sögur af því í hverri viku. Það vantar lækna, það vantar hjúkrunarfræðinga o.s.frv..
• Samgöngumálin hafa verið undirfjármögnuð og hefur verið rifist um það í mörg ár
• Menntamálin eru langt frá því á góðum stað og hafa verið lengi og hefur verið deilt um það í mörg ár. Frá leikskóla og upp úr.
• Félagskerfið undirfjármagnað frá því ég man eftir mér og t.d. alltof margir öryrkjar og ellilífeyrisþegar lifa við mjög slæm kjör. Foreldrar fatlaðra og veikra barna fá ekki þá aðstoð sem þau ættu að fá.
• Lögreglan undirfjármögnuð í áraraðir
• Landbúnaðarmálin í ólestir þar sem t.d. margir bændur sjá ekki fram úr vandamálunum
Listinn gæti verið enn lengri.“
„Miðað við þær auðlindir sem við eigum og nokkuð mikla skattheimtu hér, bæði af einstaklingum og fyrirtækjum, þá finnst mér, eins og embættismanninum fyrrverandi í Færeyjum, að okkur ætti að ganga miklu betur og lífið á Íslandi ætti almennt að vera mun betra og ekki síst auðveldara.
Með allar þessar auðlindir og aðeins 380 þúsund. Hvers vegna stöndum við okkur ekki betur? Hvers vegna er lífið á Íslandi ekki betra/auðveldara?
Stóra spurningin er því sú. Hvað höfum við verið að gera rangt?“ Skrifar Heimir að lokum.