Síðastliðinn föstudag varð alvarlegt vinnuslys á sveitabýli í Ásahreppi í Rangárvallasýslu.
Maður lést við vinnu við dráttarvél er hann klemmdist. Hann lést af sárum sínum á vettvangi. Rannsóknardeild lögreglunnar á Suðurlandi fer með rannsókn málsins.
„Það ríkir mikil sorg í samfélaginu en þarna eru þrjú lítil börn sem koma nærri,“ segir séra Halldóra Þorvarðardóttir, prófastur í Fellsmúlaprestakalli í Suðurprófastsdæmi í samtali við mbl.is.
Bænastund fór fram í gær og segir Halldóra að það hafi verið vel mætt.
„Það var full kirkja. Tilefnið var að veita sorginni og þessum lamandi fréttum farveg og sýna samhygð og samstöðu við þessar skelfilegu aðstæður,“ segir Halldóra við mbl.is